41Yu brabli purdiwan, main olgamen!
Yubin gaburrumap miselp feis garram heinggitjif,
bat det dubala ai blanga yu brabli shainiwan en yu shoum mi yu laigim mi.
En wen yu larramgo yu heya im brabli blekwan en shainiwan.
2Blanga yu tuth, im brabli waitwan laik det ship wen dei kadimbat blanga im wul en washim im.
Holot jis rait, en yu nomo bin lujim eni tuth.
3Blanga yu maus, im jis laik redwan ribin.
En wen yu toktokbat, yu luk brabli purdiwan.
Wen yu gaburrumap miselp,
yu feis stil shain biyain langa det heinggitjif.
4Det nek im longwan en im brabli purdiwan blanga yu,
en yu nekleis im garram bigismob purdiwan ting heinginap raidaran langa yu nek.
5Blanga yu milk dubala brabli raunwan jis laik det dubala popo.
6Ai garra pudum main hed langa det dubala hil weya ola gudsmelwan medisin gro,
raidap ailibala wen det win blo,
en det dakbala gowei.
7Main olgamen, yu purdiwan,
en yu luk brabli purdiwan ebridei.
8Main pramis, kaman na.
Yunmi garra libum Lebanan hil kantri.
Yunmi garra gowei brom det bigwan hil gulum Amana,
en brom det dubala hil gulum Senira en Heman,
weya ola laiyan en lepad oldei jidanbat.
9Det wei yu luk langa mi, main pramis,
en det nekleis yu werrimon,
meigim mi brabli hatjamp.
10Yu luk brabli purdiwan langa mi, main pramis.
Dumaji yu laigim mi detmatj, yu mobedawan langa det wain,
en det smel blanga yu im mowa gudwan langa enijing.
11Det maus blanga yu im teist laik shugabeig, main pramis,
en det tang blanga yu im teist laik milk en shugabeig langa mi.
En yu klos im smel brabli gudwan laik det gudsmelwan medisin tri.
12Main olgamen, yu jis laik det speshalwan gadin.
Det gadin garram wol raidaran,
en im garram im ronwan springwoda.
13-14Deya na ola plent oldei gro gudwei.
Det gadin growimap detlot pamagrenit tri,
en olkain gudwan frut daga.
Det gadin growimap olkain plent blanga gudsmelwan medisin,
en blanga meigim det daga teist gudwei.
15Yu na jis laik det woda weya im randan en wodarim det gadin,
en jis laik det springwoda weya im oldei jidan fulwan,
en detlot lilwan krik weya kamat brom Lebanan hil kantri.
Det gel im sing,
16Win brom nowathwei, yu gidap na!
Win brom sauthwei, yu gidap du!
Blo langa dijan gadin,
en meigim ola ebrijing langa dijan gadin smel gudwan.
Main olmen, yu garra kaman iya langa main gadin,
en dagat ola gudwan frut weya yu wandim dagat.
Det men im sing,