Taim blanga ebrijing
31Wal ebrijing weya hepin langa dijan wel bin hepin langa det rait taim en ebrijing garra hepin igin langa det rait taim du.
2Wal ebrijing garram det rait taim blanga bon,
en rait taim blanga dai,
en rait taim blanga plentimbat sid,
en rait taim blanga gajimbat daga,
3en det rait taim blanga kilimbat enijing,
en det rait taim blanga jidan gudwei,
en det rait taim blanga nokamdan enijing,
en det rait taim blanga bildimap enijing igin.
4En det rait taim blanga nogudbinji,
en det rait taim blanga gudbinji,
en det rait taim blanga kraikraibat,
en det rait taim blanga densdensbat,
5en det rait taim blanga wandim sambodi,
en det rait taim blanga nomo wandim sambodi,
en det rait taim blanga pudum yu am raun langa sambodi,
en det rait taim nomo blanga pudum yu am raun langa sambodi,
6en det rait taim blanga lukabat enijing,
en det rait taim nomo blanga lukabat enijing,
en det rait taim blanga seibum ebrijing,
en det rait taim blanga tjakidawei ebrijing,
7en det rait taim blanga breikimap klos wen yu jidan soribala,
en det rait taim blanga meigimbat nyuwan klos,
en det rait taim blanga toktokbat,
en det rait taim nomo blanga toktokbat,
8en det rait taim wen yu laigim sambodi detmatj,
en det rait taim wen yu heidimbat sambodi,
en det rait taim blanga wo,
en det rait taim blanga jidan gudwei.
9Wotfo yu oldei dumbat adwek langa dijan laif? Ai nomo sabi. Im nomo album yu olagijawan. 10Wal ai sabi ola adwek weya God bin gibitbat wi. 11Imbin pikimat rait taim blanga meigim ebrijing gudwan. Imbin meigim pipul jinggabat wanim garra hepin bambai, bat wi nomo rili sabi hau God wek.
12Wal ai reken wi garra jidan brabli gudbinjiwei olataim weya wi jidan langa dijan laif. 13Wi oldei dagadagatbat en dringgimbat en wi oldei dumbat adwek. Dijan na meigim wi jidan gudbinjiwei, en ai sabi God na oldei gibit wi dijan.
14Wal ai sabi ebrijing weya God bin dum garra jidan olagijawan. Dumaji God bin meigim ebrijing brabli gudwan. Wal pipul kaan edimap enijing en dei kaan deigidawei enijing brom wanim imbin dum. God bin dum dijan, en wi ol hatjamp blanga wanim imbin dum. 15En nomeda wanim hepin tudei o enitaim, wal imbin olredi hepin bifo. God garra meigim det seimwan ting hepin igin.
Pipul nomo abum feyago
16Wal afta aibin faindat dijan. Langa dijan wel wi reken pipul garra jidan gudwei, bat najing. Aibin oldei luk detlot boswan nomo tridim olabat gudwei, en dei nomo bin gibit olabat feyago. 17Aibin tok miselp, “God garra jadjim ola pipul hu oldei dumbat ola rait ting en ola pipul hu dumbat ola nogudbala ting, dumaji ebrijing weya wi dumbat oldei hepin miselp langa det rait taim.” 18Aibin jinggabat God oldei testimbat wi blanga shoum wi, wi jis laik detlot enimul. 19Dumaji pipul en enimul garra ol dai. Wal pipul nomo difrin brom enimul, dumaji det laif blanga dubala im seim. Ai nomo sabi wotfo im lagijat. 20Wal dubala garra go langa det seim pleis, langa det graun. Deibin ol kamat brom det seim graun, en dei garra gobek langa det seim graun. 21Wal hau enibodi garra sabi if pipul spirit gowap langa hebin, en det enimul spirit godan langa graun? 22Wal ai reken dijan na det brabli gudwan ting blanga dum. Wi garra jidan gudbinjiwei langa wi wek, en tharran na meigim wi brabli gudbinji. Wi nomo sabi wanim garra hepin wen wi garra dai bambai.