Mowa woning
61Wal det sabibala bin kipgon tok, “Main biginini, yu garra wotjim miselp. Yu nomo meigim pramis blanga pei mani blanga det men hubin boro mani. Maitbi im kaan peiyimbek yu. 2If yu meigim pramis lagijat langa enibodi, yu mait trepam yu ronselp garram yu ronwan wed. 3Wen yu dum lagijat, wal det men garra jidan bos blanga yu na. Bat ai dalim yu hau blanga jidan friwan. Yu garra go kwikbala langa det men en yu garra askim im gudwei blanga larramgo yu fri brom det pramis weya yubin meigim garram im. 4Yu nomo go en silip o abum spel. 5Yu garra meigim miselp friwan brom det trep jis laik wen det bard o enimul gidawei brom det hanta.
6“Wal ola leisibala pipul garra len brom detlot lilwan ent hau dei oldei jidan. 7Detlot ent nomo garram eni bos o lida, najing, 8bat hotwethataim olabat oldei pudumwei ola daga redibala blanga det kolwethataim. 9Haulong det leisibala men garra silip? Wotaim im garra gidap brom silip? 10Im tok, ‘Ai garra abum lilwan silip. Ai jis garra dabulumap main am dubala en abum spel na.’ 11Bat wen im silip, streidawei im garra jidan brabli powan na, jis laik sambodi bin stilimbat ola ebrijing brom im.a,11Prabebs 24:33,34
12“Wal sambala pipul brabli wikitwan en dei oldei goran ebriweya en dalimbat laiya. 13Dei oldei mubumbat olabat hed blanga meigim yu bilib, bat olabat laiya. 14Olabat oldei jinggabat blanga meigimbat nogudwan plen blanga meigimbat trabul ebriweya. 15Dumaji blanga tharran weya deibin dumbat, wal trabul garra kaman en binijimap olabat en olabat garra ardim en dei garra dai.
16-19“Wal YAWEI nomo laigim dislot sebenbala ting na,
det sambodi hu oldei luk praudbalawei,
det maus blanga sambodi hu oldei dalimbat laiya,
det bingga blanga sambodi hu oldei kilimbat pipul hu nomo bin dum eni rong ting,
det main blanga sambodi hu oldei jinggabat blanga meigimbat nogudbala plen,
det dubala fut blanga sambodi hu oldei wandim dum nogudbala ting kwikbala,
det witnis hu kipgon dalimbat laiya,
en det sambodi hu meigimbat trabul blanga im femili o fren olabat.”
Woning blanga silipsilipbat garram najamen waif
20Wal det sabibala bin kipgon tok, “Wal main san, yu garra dum wanim yu dedi oldei dalimbat yu, en yu nomo fogedabat wanim yu mami oldei titjimbat yu. 21Yu garra jinggabat detlot wed olataim. Yu garra kipum detlot wed insaid langa yu hat olagijawan. 22Detlot wed garra gaidim yu wen yu wokabat langa najawan pleis en dei garra lukaftum yu wen yu silip, en dei garra album yu wen yu wek deitaim. 23Detlot wed jis laik det lemp blanga shoum yu det wei, en wen yu mami en dedi streitinimap yu, tharran garra album yu blanga dumbat gudbala ting.
24“Wal detlot wed garra kipum yu brom ola nogudbala gel en brom najamen waif hu oldei tok garram brabli switwan wed blanga meigim yu gudbinji. 25Yu nomo go langa im dumaji im brabli purdiwan. Yu nomo larram im trepam yu wen im oldei lukinatbat langa yu garram im ai. 26Det men hu pei mani blanga silip garram eni gel garra faindim miselp powan, bat det men hu silipsilip garram merrit gel maitbi im garra pei garram im laif.
27Wal if yu garrimap brabli hotwan eshis langa yu briskit yu garra barnimap yu klos. 28En if yu wok ontop langa hotwan eshis yu garra barnim yu dubala fut. 29Wal seimwei lagijat du yu garra meigimbat trabul blanga yu ronselp wen yu silipsilipbat garram najamen waif. Wal if enibodi dum detkain ting, wal im garra abum panishmen.
30“Wal pipul nomo heidimbat sambodi hu stilimbat enijing dumaji im hanggriwan, 31bat if sambodi faindim im stilimbat, wal im garra lafta peibek sebentaim blanga wanim imbin stilimbat. Im garra gibit ol im ebrijing weya im garram.
32Wal eni men hu go en silipsilipbat garram najamen waif, im nomo sabi enijing. Im garra binijimap miselp. 33Im garra sheim miselp en im garra gedim haiding en im garra jidan sheimwan olagijawan. 34Det hasbin im gitwail brabliwei wen im jelas. Im kaan sori langa det najawan men. 35Nomo enikain ting o mani garra meigim im sedisfaid! Im garra kipgon jidanbat wailwan!

a6:10: ,11Prabebs 24:33,34