221If yu jidan gudbala en pipul abum rispek blanga yu wal tharran im mowa gudwan den yu abum loda silba en gol.
2Ola ritjmen en ola powan, YAWEI det trubala God na bin meigim olabat holot.
3Wen yu luk trabul kaman nomo joinin laik detlot pipul hu nomo sabi enijing. Yu garra kipawei.
4If yu shoum rispek langa YAWEI en jidan lobala yu garra jidan ritjwan en ebribodi garra rispek langa yu en yu garra jidan laibala longtaim.
5If yu laigim det laif blanga yu, wal yu garra kipawei brom ol detlot trep weya trikim ola wikitwan pipul.
6Yu garra titjim yu biginini olabat blanga jidan raitwei en wen olabat gro bigwan, wal olabat garra sabi hau blanga jidan raitwei.
7Detlot ritj pipul oldei jidan bos blanga ola powan pipul, en detlot hu oldei borobat mani, olabat jidan prisana blanga detlot hu oldei lendimbat olabat mani.
8Detlot pipul hu nomo gibit feyago langa pipul garra abum trabul, en wen dei git brabli wail nobodi kaan lisin langa olabat.
9YAWEI oldei lukaftumbat detlot pipul hu oldei gibit daga langa ola po pipul.
10Yu garra lafta andimwei detlot pipul hu mokimbat pipul, wulijim ebribodi gin jidan kwaitwei, nomo garram eni agamin o fait.
11Det king jidan fren blanga detlot pipul hu im trastimbat en hu oldei toktok gudbinjiwei.
12YAWEI oldei maindimbat detlot pipul hu jidan trubalawei, bat im meigim nogudbala ola plen blanga detlot pipul hu oldei tok laiyinbala wed.
13Nomo jidan leisibala en tok, “If ai go langa wek det laiyan mait kilim mi en dagat mi.”
14Det wed blanga nogudbala wuman im laik det brabli dipwan hol, en if yu meigim YAWEI gitwail, wal yu garra buldan insaid deya na.
15Ola biginini brabli siliwan, bat if yu streitinimap olabat dei garra sabi ola raitwan ting.
16If yu tjidimbat ola po pipul blanga meigim miselp ritjwan, o yu gibit presen langa ola ritj pipul, wal yu garra jidan powan miselp du.
30 Brabli gudwan wed
17Wal det sabibala tok, “Yu teiknodis en lisin langa dislot wed blanga sambala sabibala pipul. Yu garra jinggabat gudwei wanim ai titjimbat yu. 18Yu garra jidan gudbinji blanga ol dislot wed en yu garra kipum langa yu main. 19Ai titjimbat yu dislot wed tudei, wulijim yu garra trastimbat YAWEI det trubala God. 20Aibin raidimdan 30 brabli gudwan wed blanga meigim yu sabi ola gudbala wed. 21Yu gin trastim detlot wed brabliwei blanga gibit yu ola raitwan ensa blanga detlot hu jidan bos blanga yu.”
-1-
22Nomo tridimbat po pipul nogudwei en nomo tjidimbat olabat langa kothaus. 23YAWEI na oldei maindim olabat, en wanim yu dum langa olabat im garra dum langa yu.
-2-
24Nomo meigim fren garram sambodi hu oldei gitwail kwikbala, 25o yu mait jidan wulijim im en yu garra faindim miselp langa trep.
-3-
26Yu nomo meigim pramis blanga peiyim blanga sambodi hubin bukdan samting. 27If yu kaan pei wanim im owim maitbi dei garra deigimwei yu sweig en ebrijing blanga yu.
-4-
28Yu nomo mubum detlot bandri mak blanga stilim eni kantri weya wi grengrenfatha olabat bin makambat. Detlot bandri mak bin jidan deya brom wi grengrenfathamob taim.
-5-
29If yu dum yu wek gudwei, yu garra wek blanga det king en yu kaan jidan wekinmen blanga odinri pipul.