Yu garra jidan sabibalawan en nomo bulurrum ola nogudwan ting
21Wal det sabibala tok dijan, “Main biginini, yu len wanim mi titjimbat yu. Yu garra oldei jinggabat wanim mi oldei dalimbat yu blanga dum. 2Yu garra lisin langa ola brabli gudwan wed en trai blanga sabi detlot ting. 3Yu garra kipgon askimbat mi blanga meigim yu jidan sabibalawan. 4Yu garra wek brabli adbala blanga jidan sabibala, jis laik wen yu go lukabat blanga silba o gol, en yu kaan gibap, najing. 5If yu dum lagijat yu garra sabi en shoum rispek langa YAWEI det trubala God en yu garra sabi mowa blanga im. 6Oni YAWEI na garra meigim yu jidan sabibala, en album yu blanga sabi mowa. 7Im na oldei maindimbat en albumbat detlot pipul hu oldei dum wanim rait en jidan trubalawei. 8Im na oldei maindimbat detlot pipul hu oldei gibit feyago langa najalot pipul en im oldei maindimbat detlot pipul hu oldei jidan trubala langa im.
9“Wal if yu dum lagijat yu garra sabi hau blanga jidan trubalawei en gibit pipul feyago, en hau blanga jidan raitwei. 10Yu garra jidan sabibala en yu garra jidan brabli gudbinji wen yu sabi brabliwei. 11-12Detlot brabli gudwan wed garra seibum yu en album yu nomo blanga dumbat eni nogudbala ting, en im garra seibum yu brom detlot pipul hu oldei toktokbat nogudbalawei blanga yu. 13Olabat bin stap dumbat ola rait ting. Dei oldei dumbat ola nogudbala ting jis laik dei wok langa brabli dakbala pleis. 14Olabat oldei laigim dumbat ola nogudbala ting en olabat gudbinji blanga dumbat detlot nogudwan ting. 15Yu kaan trastim olabat dumaji det wei blanga olabat nomo trubalawan.
16“Wal detlot brabli gudwan wed garra album yu blanga gibit bekboun langa eni tufeis gel weya tok garram brabli switwan wed langa yu. 17Det gel nomo jidan trubala langa im hasbin. Im fogedabat det pramis weya imbin meigim lida langa God. 18If yu go langa im haus, wal yu garra dai dumaji im jis laik yu wokwokbat langa det nogudwan roud langa det pleis weya ola dedbala pipul oldei jidanbat. 19Nobodi kaan go langa im haus en kambek laibwan brom det pleis. 20Bat yu garra bulurrum det wei blanga ola sabibala pipul en jidan gudwei. 21Detlot pipul hu oldei jidan trubalawei garra jidan langa olabat kantri. 22Bat detlot nogudbala pipul hu oldei dumbat nogudbala ting, wal God na garra andimwei olabat brom olabat kantri.”