971YAWEI det trubala God im brabli boswan!
Ola pipul langa ebri kantri yumob gudbinji.
Jidan gudbinji ola pipul langa ola longweiwan kantri.
2Ola klaud en det dakbala jidan raidaran langa YAWEI.
Im jidan bos en dumbat ebrijing raitwei,
en im gibitbat ebribodi feyago.
3Det faiya go lida langa im en barnimap ol im enami olabat.
4Ola laitining blanga im shainimap dijan wel, en wen ola pipul luk tharran, im meigim olabat sheik nomo lilbit.
5Ola hil meltap lida langa YAWEI.
Im det boswan blanga ebrijing langa dijan graun tudei.
6Ebrijing langa skai shoum det raitwei blanga im.
En ebribodi langa ebri kantri luk im pawa en im shainiwan lait.
7Ebribodi hu weshipbat ola drimin sheip, en hu jidan praudbala blanga olabat drimin, garra sheim miselp.
Ola drimin nildan en weship YAWEI.
8Detlot pipul brom Jerusalem en ola taun langa Juda jidan gudbinji,
dumaji yu na, YAWEI det trubala God jadjim pipul raitwei.
9YAWEI, yu na det boswan God en yu jidan boswan blanga dijan wel.
Yu jidan mowa haibala langa ola drimin.
10YAWEI laigim ol detlot pipul hu nomo laigim dumbat brabli nogudbala ting, en hu nomo laigim wen najalot pipul dumbat nogudbala ting du.
Im lukaftum im pipul olabat.
Im seibum olabat brom det pawa blanga ola brabli nogudbala pipul.
11God im oldei deya langa det lait seimwei laik im oldei gibit gudbala ting langa detlot pipul hu oldei dumbat ola rait ting,
En im meigim ola gudbala pipul jidan gudbinjiwei.
12Ol yumob pipul hu jidan raitwei,
yumob garra gudbinji blanga wanim YAWEI bin dum.
Jinggabat wanim det brabli holiwan God bin dum en gibit im theingks.
God det boswan blanga dijan wel