851YAWEI, yubin oldei shoum yu kainbala filing langa yu pipul langa Isreil.
Yubin gibit olabat ebrijing igin.
2Yu nomo bin peiyimbek yu pipul olabat blanga olabat nogudbalawei,
en yubin meigim olabat fri.
3Yubin stap gitwailbat langa olabat en yubin holdimbek yuselp.
4God, yu seibum melabat na,
en yu bringimbek melabat langa melabat kantri.
Nomo jidan nogudbinji garram melabat.
5God wanim yu garra dum?
Yu garra jidan nogudbinji langa melabat olagijawan?
Yu garra jidan nogudbinji en wail langa melabat en melabat bigininimob hu garra jidan bambai du?
6Yu meigim melabat strongbala igin wulijim melabat yu pipul olabat garra preisimbat yu gudbinjiwei.
7YAWEI yu seibum melabat,
en shoum melabat yu laigim melabat olataim.
Det serramonimen dalim ola pipul wanim YAWEI im tok
8Lisin langa wanim YAWEI det trubala God im toktok langa wi, im ronwan pipul olabat.
Im pramisim wi blanga jidan gudbinjiwei if wi nomo gobek langa wi nogudbalawei.
9Trubala, im oldei redi blanga seibum ol detlot hu oldei shoum rispek langa im,
en wi gin luk im pawa blanga seibumbat im jidan langa wi kantri.
10YAWEI yu na laigim yu pipul olabat brabliwei,
en yu na oldei jidan trubala langa olabat olataim.
Yu na oldei dum ebrijing raitwei blanga olabat,
en yu na oldei meigim ebrijing gudwan blanga olabat.
11Wen pipul jidan trubala langa God tharran na garra gowap langa im,
en det raitwei blanga God garra kamdan en jidan langa olabat.
12Trubala, YAWEI garra gibit ola gudwan ebrijing,
en wi kantri garra abum detmatj daga.
13Det trubalawei blanga YAWEI garra go lida langa im,
en meigim det wei redibala blanga im.
Dijan preya blanga albumbat