Eisaf bin raidimdan dijan song.
761Ola pipul langa det kantri Juda sabi God.
Dei rispek im neim langa Isreil.
2Im garram kemp langa Jerusalem.
Im jidan langa Saiyan, det bigwan hil.
3Deya na, imbin breigimap ola erro blanga ol im enamimob, en ola shild en bigwan naif blanga olabat du.
Ebrijing weya deibin abum blanga fait imbin breigimap.
4God, yu shain garram lait brabliwei.
Yu jidan brabli haibalawan wen yu kambek brom detlot bigwan hil weya yubin bidim ol yu enamimob.
5Ola breibwan soljamob blanga olabat nomo garram enijing na, en tudei olabat ol dedwan.
Olabat bin strongbala en bin sabi hau blanga fait, bat najing na.
Olabat kaan dum enijing.
6God blanga Jeikob, wen yubin graulim olabat adbalawei,
detlot hosis en ola men bin buldanbuldan ded.
7Bat oni langa yu YAWEI, ebribodi bradin.
Wen yu gitwail, nobodi kaan jandap langa yu.
8Brom ontop langa hebin yubin larram pipul sabi blanga yu kotkeis.
Ola pipul langa dijan wel bin bradin en deibin jidan kwaitbala.
9Wen yubin gidap blanga tok langa det kotkeis,
yubin gitredi blanga seibum ola pipul langa dijan wel hu abumbat olkain trabul.
10Pipul preisim yu, YAWEI dumaji yu gitwail langa eni nogudbalawei.
Ol detlot hu nomo gitkil langa wofait garra kipgon preisimbat yu.
11Gibit langa YAWEI, yu God wanim yubin pramisim im.
Bringimap ola presen langa im, ol yumob pipul hu jidan langa ola gulijapwan kantri.
YAWEI meigim ola pipul bradin en jidan garram rispek langa im brabliwei.
12Im meigim ola praudbala bos jidan lobala.
Im meigim ola strongwan king bradin brabliwei.
God meigim im pipul fil gudwan wen dei abum pein