Salaman bin raidimdan dijan preya.
721God, yu album det king blanga kotim pipul raitwei.
Yu album im blanga gibit pipul feyago laik yu oldei dum,
2wulijim im gin jidan bos blanga yu pipulmob raitwei,
en gibit feyago langa detlot pipul hu abumbat adtaim.
3Meigim dijan kantri jidan gudbalawei garram ebrijing,
dumaji yu pipul bulurrum det raitwei blanga yu.
4Meigim det king kotim ola powan pipul feyagowei,
en albumbat ola pipul hu nomo abum enijing,
en bidim detlot hu oldei gibit olabat adtaim.
5Meigim det king jidan laibala olataim,
jis laik det san shain olataim, en det mun gibit lait olataim.
6Meigim det king jidan jis laik rein weya meigim ebrijing gudwan langa dijan kantri.
7Meigim det king jidan det raitwei langa im laif olataim,
wulijim ola pipul garra jidan gudbinjiwei garram ebrijing olagijawan.
8Larram im jidan bos blanga ola kantri brom wan solwoda raidap langa najawan solwoda,
en brom det Yufreitis Riba raidap najasaid langa dijan wel,aSekaraiya 9:10
9en detlot pipul hu jidan langa drai kantri garra nildan lida langa im,
en im enami olabat garra buldan feisdan langa graun.
10Ola king brom Tashish en brom ola ailin kantri garra gibitbat presen langa im.
Detlot king brom Shiba en Seba garra bringimap ola ofring langa im du.
11Meigim ola king nildan lida langa im,
en ola pipul brom ebri kantri garra wek blanga im.
12Im seibum ola powan pipul wen olabat jingat langa im,
en ol detlot du hu nomo garram enijing en detlot weya nobodi album olabat.
13Im garram soriwan filing blanga ola wikwan en ola powan pipul,
en im seibum detlot laif blanga ol detlot hu nomo garram enibodi blanga albumbat olabat.
14Im seibum olabat brom abumbat adtaim en brom faitfaitbat,
dumaji olabat laif jidan speshalwan langa im.
15Trubala, longtaim im garra jidan king!
Larram detlot pipul brom Shiba gibit im gol.
Larram ola pipul prei blanga im olataim.
Larram God jidan gudbala langa im olataim.
16Larram ola sid daga jidan detmatj langa det kantri.
Larram ola hil kantri jidan garram detmatj daga, jis laik Lebanan garram detmatj.
Larram ola taun jidan garram detmatj pipul, jis laik ola fam kantri jidan garram detmatj gras.
17Larram pipul jinggabat det neim blanga det king olagijawan, en nomo fogedabat im.
Larram pipul ebriweya sabi blanga im raidap det taim weya det san kaan gibit lait enimo.
Larram pipul langa ebri kantri askim God blanga jidan gudbalawei langa olabat, seimwei laik imbin gudbala langa det king.
18Preisim YAWEI det God blanga Isreil!
Oni im na oldei dumbat ola gudwan ting.
19Preisim im haibalawan neim olagijawan.
Larram ola pipul ebriweya sabi det haibalawei blanga im.
Yuwai! Trubala!
20Dijan na det laswanpat blanga ola preya weya Deibid det san blanga Jesi bin prei.
God garra gibit ebribodi feyago

a72:8: Sekaraiya 9:10