711YAWEI, ai kaman langa yu blanga kipum mi seifwan.
Nomo larram enibodi meigim mi sheim.
2Dumaji yu oldei dum wanim rait, album mi en seibum mi.
Irrim mi en seibum mi.
3YAWEI, yu jidan jis laiga bigwan ston weya ai gin go enitaim blanga jidan seifwan.
Yu main seifwan haus en yu fait blanga mi.
4Main God, yu seibum mi brom ola nogudbala pipul,
en brom det pawa blanga ola krulwan en brabli nogudwan pipul.
5YAWEI yu det boswan God. Ai libum ebrijing langa yu.
Aibin trastimbat yu brom yang taim.
6Ol main laif aibin larram yu hendulum ebrijing.
Yubin maindimbat mi olawei brom det taim wen aibin bon.
Ai garra preisimbat yu olataim.
7Main laif shoum loda pipul,
yu na strongwan en yu oldei lukaftumbat mi.
8Mi preisimbat yu oldei.
Mi tokabat yu dumaji yu brabli haibalawan.
9Nomo libum mi dumaji mi olbala.
Nomo libum mi na dumaji mi wikwan.
10Main enami olabat wandim kilim mi ded.
Olabat tokabat blanga wanim dei garra dum langa mi.
11Olabat tok, “God bin libum im na.
Wi garra go en gedim im. Nobodi kaan seibum im.”
12God, nomo jidan longwei.
Kaman kwikbala en album mi.
13Yu nomo larram detlot hu kaman blanga fait langa mi win. Yu binijap olabat.
Yu meigim detlot hu wandi ardim mi, sheim brabliwei.
14Ai garra oldei trastim langa yu blanga ebrijing.
Ai garra kipgon preisimbat yu.
15Ai garra dalimbat ola gudbala ting weya yu oldei dumbat blanga seibum yu pipul olabat,
nomeda ai nomo sabi ebrijing weya yubin dum.
16YAWEI, yu na det brabli strongwan God,
en yu na bin dum detmatj ting garram yu pawa.
Ai garra tokabat blanga yu dumaji yu trubala.
Oni yu na ai garra preisim.
17Main God, brom wen aibin lilwan yubin titjim mi,
en raidap tudei mi stil dalimbat pipul blanga ola gudwan ting weya yu oldei dumbat.
18Main God, nomo libum mi dumaji mi olwan en mi garram greiwan heya.
Jidan garram mi wen mi toktokbat blanga yu pawa langa ola biginini, en olabat bigininimob wen dei garra kaman bambai.
19Blanga yu raitwei im gajimap det skai. Yubin dum loda haibalawan ting.
Nobodi jidan wulijim yu, najing.
20Yubin meigim trabul kaman langa mi en aibin ardim, bat yu garra meigim mi strongbala igin.
Yu kaan larram mi go langa greibyad.
21Yu garra meigim mi jidan mowa haibalawan igin.
Yu garra meigim mi jidan gudbinjiwei igin.
22Ai garra preisim yu garram gita.
Blanga det trubalawei blanga yu ai garra preisim yu, main God.
Garram main gita ai garra plei ola song langa yu, det holiwan God blanga Isreil.
23Ai garra jingat gudbinjiwei wen mi preisim yu.
Brabliwei na ai garra sing dumaji yubin baiyimbek mi.
24Oldei ai garra tokabat blanga det raitwei blanga yu,
dumaji ol detlot hubin wandim trai kilim mi,
dei nomo bin win en dei jidan brabli sheim na.
Dijan preya blanga king