Deibid bin raidimdan dijan song blanga det boswan blanga myusik.
681God, yu gidap en meigim yu enami olabat ranawei ebriweya.
Detlot hu nomo laigim yu, olabat ranawei dumaji dei nomo bin win.
2Yu andimwei olabat ebriweya wulijim det win wen im blowimwei det smok.
Wulijim kendul weya im meltap langa faiya, wal lagijat du detlot nogudwan pipul garra binij rait deya lida langa yu God.
3Bat ola pipul hu jidan trubalawei garra gudbinji deya weya God im jidan.
Olabat garra gudbinji en jingat adbala gudbinjiwei.
4Sing langa God. Sing preis song langa im neim.
Meigim det wei redi blanga tharran hu kaminap garram klaud.
Im neim YAWEI det trubala God.
Jidan gudbinji garram im.
5God hu jidan langa im Serramoni Pleis,
oldei lukaftumbat ola pipul hu nomo garram mami en dedi en ola widogel du.
6Im gibit kemp langa pipul hu nomo garram femili, en meigim ola prisana jidan gudbinji en fri.
Bat pipul hu laigim faidabat garra jidan langa kantri weya nomo garram enijing.
7God, wen yubin deigimat yu pipul olabat brom Ijip,
en yubin go lida langa olabat deya langa det deset kantri,
8det graun bin sheik en rein bin buldan,
dumaji yu na God, det God hubin tok langa Sainai,
en yu na det God blanga ola Isreil pipul.aEksadas 19:18
9Yubin meigim detmatj rein kaman en meigim det drai kantri gudwan igin.
10Yu pipul olabat bin meigim olabat kemp deya na,
en garram yu gudwan filing yubin album ola powan pipul.
11Bos, yubin gibit wed en loda wuman bin deigim dijan nyus ebriweya,
12“Ola boswan en olabat amimob ranaweibat na!”
Lagijat na deibin tok.
Ol detlot wuman hubin stap langa kemp en maindimbat ola ship bin kadimat miselp ebrijing weya deibin gedim langa det wofait.
13Deibin gedimbat detmatj silba en gol,
en olabat bin jidan purdiwan jis laiga purdiwan bard.
14Wen God det brabli boswan bin andimwei ola king langa det bigwan hil gulum Seilman,
imbin meigim sno buldan deya.
15Beishan im brabli bigwan hil.
Im jandap garram loda haiwan haiwan hil.
16Beishan, wotfo yu jidan jelas langa det hil gulum Saiyan weya God bin pikimat blanga jidan?
YAWEI det trubala God garra jidan deya olagijawan na.
17YAWEI bin kaman brom Sainai blanga go langa det seikridwan haus langa Saiyan.
Imbin kaman garram detmatj hos en bagi yu kaan adli kaundimap olabat, jis laik ola lif langa tri.
18Imbin gowap langa det haibalawan hil gulum Saiyan,
en imbin deigim loda prisana garram im du.
Ola pipul bin gibit im gudwan ting,
en detlot nogudbala pipul hubin gibit bekboun langa im bin gibit im gudwan ting du.
YAWEI det trubala God garra jidan deya na.bIfishans 4:8
19Wi garra preisim det Bos hu oldei garrimap wi trabul ebridei.
Im na det God hu oldei seibum wi.
20Det God blanga wi na im det God hu oldei seibum wi.
Im na YAWEI det trubala God, wi Bos.
Im na seibumbat wi brom daidaibat.
21God na garra breigimap ola hedpat blanga im enami olabat,
ol detlot na hu kipgon dumbat ola nogudbala ting.
22Det Bos bin tok,
“Ai garra bringimbek yu enami olabat brom det hil kantri gulum Beishan.
En ai garra bringimbek olabat brom det dipwan solwoda,
23wulijim yumob garra wok langa olabat blad,
en ola dog blanga yumob gin dagadagat haumatj dei wandim.”
24Main God, yubin win,
en ebribodi bin luk yubin go lida langa yu brabli seikridwan pleis.
25Ola singa bin go lida,
en detlot hubin plei myusik bin kaman biyain,
en langa midul ola yanggel bin hitimbat ola lilwan dram.
26Wen ol im pipul olabat midap olabat tok, “Preisim God.
Preisim YAWEI ol yumob femili blanga Jeikob.”
27Det lilwan klen blanga Benjamin bin go lida basdam.
Brom deya ola lida blanga det klen blanga Juda garram olabat pipul olabat,
en afta, ola lida blanga det dubala klen gulum Sebyulan en Neftali.
28-29God, brom yu seikridwan pleis langa Jerusalem weya ola boswan king oldei bringim presen langa yu,
shoum yu pawa, det pawa na weya yubin yusum basdam blanga seibum melabat.
30Panishim detlot pipul langa Ijip hu jidan jis laik det wailwan enimul langa ribasaid,
en panishim detlot enami olabat langa najalot kantri hu bosmob jidan laik ola wailwan buligi, raidap olabat meigim miselp lobala langa yu en gibit yu ola silba.
Yu jandimwei ebriweya detlot pipul hu oldei laigim meigimbat wofait.
31Meigim detlot boswan kaman brom Ijip garram ola kopawan presen,
en meigim detlot Ithiyopiya pipul lidimap olabat bingga blanga prei langa God.
32Sing song langa God ola pipul ebriweya langa dis wel.
Sing blanga preisim im.
33Im na kaman garram klaud brom det skai weya imbin meigim longtaim.
Ebribodi irrim det thanda.
Tharran na YAWEI jinginatbat adbala.
34Ebribodi garra tok blanga det pawa blanga God.
Im na jidan brabli boswan langa ola Isreil pipul,
en det skai na shoum im pawa.
35Im brabli haibalawan God en im kaman brom det pleis weya im jidan.
Im na det God blanga ola Isreil pipul.
Im na meigim im pipul olabat strongbala,
en im na gibit olabat pawa.
Preisim God!
Preya langa God blanga album

a68:8: Eksadas 19:18

b68:18: Ifishans 4:8