Deibid bin raidimdan dijan song blanga det bos blanga ola myusik.
651Brabliwei melabat garra preisim yu deya langa Saiyan, God,
en melabat garra kipumbat ola pramis melabat bin meigim langa yu.
2Dumaji yu oldei ensim ola preya,
pipul brom ebriweya garra kaman langa yu.
3Ola nogudbala ting melabat oldei dumbat jidan bos blanga melabat,
bat yu na oldei sori en larramgo melabat fri.
4Ol detlot pipul weya yubin pikimat en bringimap blanga jidan langa det seikridwan haus blanga yu, jidan gudbinjiwan.
Melabat garra jidan gudbinjiwei garram ola gudwan ting langa det seikridwan haus blanga yu.
5God, wen yu irrim melabat preya yu oldei dum ola brabli gudbala ting en seibum melabat.
Pipul langa ebri kantri en brom najasaid langa solwoda du trastimbat yu, God.
6Garram yu pawa yubin meigim ola bigwan hil en pudum olabat langa olabat raitwan pleis,
en dei shoum pipul yu na brabli strongwan.
7Yu meigim det solwoda jidan kwaitbala.
Yu meigim pipul jidan kwaitbala wen dei meigimbat trabul.
8Wen yu dum ola brabli gudbala ting, ola pipul brom ola kantri sanraiswei raidap langa ola kantri sangodanwei hatjamp brabliwei, en olabat jingat gudbinjiwei.
9Yu lukaftumbat dijan graun.
Yu jandimdan rein en meigim det graun jidan brabli gudwan wulijim ola daga garra gro.
Yu bilimap ola draiwan krik en ola riba garram woda.
Yu pudum ola plent langa graun blanga ola pipul blanga dagat, en yu growimap olkain daga.
Yu na dumbat ol dislot ting.
10Yu jandimdan rein blanga meigim det graun jidan wetwan blanga meigim redibala blanga growimapbat ola sid daga.
Yu jandimdan rein blanga meigim det graun sofwan wulijim ola yangwan plent garra gro.
11God, dumaji yu brabli gudbala, yu gibit melabat detmatj gudwan ting.
Yu gibit melabat olkain daga en detmatj buligi, ship en nenigout.
12Ebriweya langa kantri detmatj buligi, ship en nenigout jidan.
Ola hil kantri garram olkain plent en gras en tri, en im jis laik im preisim yu gudbinjiwei.
13Ola ship jidan detmatj langa det kantri,
en sid daga gaburrumap ola plein kantri.
Im jis laik ebrijing brabli gudbinji en sing en preisim yu.
Song blanga gibit preis en theingks langa YAWEI