Deibid bin raidimdan dijan preya.
641Mi garram trabul, God.
Yu irrim main preya!
Mi bradin blanga main enamimob.
Yu seibum main laif!
2Yu maindim mi brom detlot nogudwan plen blanga detlot nogudwan pipul.
Olabat bigmob nogudwan pipul.
3Olabat yusum olabat tang blanga tok ola wed laik shapwan naif,
en ola krulwan wed kamat jis laik ola poisinwan erro weya det hanta yusum.
4Olabat nomo bradin.
Brabliwei dei spredimat ola laiyawan stori blanga ola gudbala pipul.
Dei jis laik det hanta weya blandim miselp en shudum im erro.
5Olabat album gija blanga dum nogudbala plen.
Olabat tok gija hau dei garra pudum ola trep blanga gudbala pipul.
En olabat tok, “Nobodi kaan luk melabat.
God du kaan luk melabat.”
6Olabat jidan en meigim plen blanga dum nogudbala ting en dei tok,
“Wibin meigim brabli gudwan plen blanga dum.”
Det hat en main blanga pipul im brabli difrinwan.
Wi kaan sabi wanim dei jinggabat.
7Bat God garra shudum olabat garram ol im erro,
en streidawei olabat garra gitkil.
8Im garra binijimap olabat blanga detlot nogud wed deibin tok.
Detlot nogudbala wed weya deibin oldei toktok garra binijimap olabat.
Ebribodi hu garra luk olabat garra sheikim olabat hed blanga mokimbat langa olabat.
9Olabat holot garra bradin.
Dei garra jinggabat wanim God bin dum en dei garra tok blanga ola ting weya imbin dumbat.
10Ola pipul hu jidan raitwei langa YAWEI garra gudbinji blanga wanim imbin dum.
Olabat garra go langa im blanga jidan seifwan.
Ola gudwan pipul garra preisim im.
Song blanga preisim en gibitbat theingks langa God