Deibid bin raidimdan dijan wen imbin jidan langa det deset kantri langa Judiya.
Sekan Semyul 15:23-28
631God, yu na main God, en mi wandim yu brabliwei.
Holot main filing wandim yu.
Main spirit jidan wikwan en mi thestiwan blanga yu,
jis laik drai en rabishwan kantri weya wandim woda.
2Larram mi luk yu deya langa yu seikridwan haus.
Larram mi luk hau strongbala en haibala yu jidan.
3Yu filing blanga kipgon laigimbat mi im mobeda langa mi den blanga jidan laibala,
en blanga tharran na ai garra preisim yu.
4Ai garra oldei gibitbat yu theingks raidap mi dai.
Ai garra lidimap main bingga langa yu wen mi prei.
5Main spirit garra jidan bulap en sedisfaid jis laik aibin dagat detmatj daga.
en ai garra sing ola hepiwan song blanga preisim yu.
6Naitaim wen mi leidan mi oldei jinggabat langa yu,
en olnait mi jinggabat langa yu,
7dumaji yu na bin oldei albumbat mi.
Mi sing hepiwan song dumaji mi gudbinji.
Mi jidan seifwan garram yu, jis laiga beibiwan jukjuk weya im jidan seifwan andanith langa im mami wing.
8Mi heingon langa yu,
en yu bingga kipum mi seifwan.
9Detlot hu oldei trai blanga kilim mi ded garra godan langa det pleis weya ola dedwan pipul jidan.
10Olabat garra gitkil langa wofait,
en ola wailwan dog garra dagadagat olabat bodi.
11Dumaji God album det king blanga win,
det king garra jidan gudbinjiwan.
Detlot hu meigim pramis garram God neim garra preisim im,
bat God garra jadimap ola maus blanga laiyinbala pipul.
Preya blanga jidan seifwan