Deibid bin raidimdan dijan afta Sol bin jandim sambala men langa im kemp blanga kilim im ded.
Fes Semyul 19:11-17
591Main God, seibum mi brom main enami olabat.
Lukaftum mi brom ol detlot hu wandim kilimbat mi.
2Seibum mi brom ol detlot nogudbala pipul.
Seibum mi brom detlot hu laigim medrimbat pipul.
3Yu luk deya! Olabat weidabat blanga kilim mi ded.
Ola krulwan pipul majurrumapbat miselp langa mi,
bat ai nomo bin dum eni rong ting!
4YAWEI, dei meigimbat miselp redi blanga kilim mi,
bat ai nomo bin dum enijing rong!
Gidap na en album mi garram main trabul.
Yu luk tharran garram yu ron ai.
5YAWEI, main boswan God, en God blanga ola Isreil pipul,
gidap na en panishim ol detlot pipul brom ebri kantri.
Yu nomo sori langa detlot hu jidan nogudbala en tufeiswan.
6Main enami olabat oldei kambek ebri aftanuntaim,
jis laik ola jigiwan dog weya dei wokaranbat ebriweya langa taun.
7Detlot nogudbala wed weya dei toktok gin kadim jis laik ola bigwan naif,
en dei tok langa dei ronselp,
“God kaan lisin langa wi.”
8Bat yu laf langa olabat, YAWEI.
Yu mokim ol detlot pipul brom ebri kantri hu nomo bilib langa yu.
9Main God, yu na main seifwan haus.
Ai gin go langa yu dumaji yu na main seifwan haus.
10Main God, yu oldei laigim mi,
en yu garra go lida langa mi,
en larram mi luk weya yu bidim main enami olabat hu oldei tok nogudbalawei blanga mi.
11Bat nomo kilim olabat ded, main Bos,
bambai main kantrimenmob mait fogedabat ebrijing yubin dum.
Yu win oba langa olabat garram yu strongbala pawa,
en spredimat olabat ebriweya,
dumaji yu na det shild blanga melabat.
12Olabat tok brabli nogudbalawei,
en detlot nogudwan wed jidan langa olabat maus.
Larram detlot wed dagat olabat,
dumaji dei reken miselp detmatj.
Dumaji olabat oldei sweya,
en oldei dalimbat laiya du,
13wal yu gitwail langa olabat en binijimap olabat.
Yu binijimap olabat holot na!
En bambai na ebribodi oloba langa dijan wel garra sabi God im jidan boswan blanga Isreil.
14Main enami olabat oldei kambek ebri aftanuntaim,
jis laik detlot jigiwan dog weya dei ranabat ebriweya langa taun.
15Olabat jis laik detlot jigiwan dog weya dei oldei lukaranbat blanga daga,
en if dei nomo faidim naf daga dei stat jinginatbat adbala.
16Bat main God, ai garra singim song blanga yu blanga det strongwan pawa blanga yu.
Ebri moning ai garra singim song blanga yu filing blanga laigim olagijawan.
Yu oldei jidan main seifwan haus.
Wen trabul kaman langa mi ai go langa yu blanga kipum mi seif.
17Main God, ai preisim yu, dumaji yu brabli strongbalawan.
Ai go langa yu blanga kipum mi seif.
Yu oldei laigimbat mi detmatj.
Dijan preya blanga seibum pipul brom nogudbala ting