Deibid bin raidimdan dijan song blanga det boswan blanga myusik en imbin dalim im blanga yusum ola difrinkain gita.
551God, yu irrim main preya.
Nomo tenawei wen mi jingat langa yu blanga album mi.
2Irrim mi en ensim mi.
Mi wikwan na brom oldei jinggabat ol main trabul.
3Ol main enami olabat toktok blanga kilim mi,
en mi bradin brabliwei na.
Mi jidan brabli nogudbinji brom ol detlot enami hu oldei gibit mi adtaim.
Olabat oldei meigim trabul kaman langa mi,
en olabat oldei wail en heidim mi.
4Mi bradin brabliwei,
en det filing blanga dai im bradinim mi brabliwei.
5Mi bradin nomo lilbit en mi sheiksheik.
Mi bradin brabliwei.
6If ai bina abum wing wulijim det pijin,
ai bina flaiwei blanga faindim pleis blanga abum spel.
7Ai bina flai longwei en meigim main kemp langa deset.
8Kwikbalawei ai bina faindim main ronwan pleis blanga kipum miselp seifwan brom det strongwan win en bigwan rein.
9Bos, yu meigim main enami olabat tok garram difrindifrin langgus, wulijim dei kaan andasten miselp,
dumaji mi luk pipul dumbat nogud ting en meigim trabul langa det bigwan taun.
10Olkain trabul jidan deitaim en naitaim.
Im meigim det taun jidan garram mowa nogud ting en trabul.
11Ola nogudbala pipul meigim trabul en dumbat nogudbala ting ebriweya langa det taun.
Ola roud jidan garram ola nogudbala pipul hu gibitbat adtaim en dalimbat laiya.
12If im bina main enami mokimbat mi,
ai bina larram tharran.
If im bina main enami tokabat blanga mi praudbalawei,
wal ai bina haidim miselp brom im.
13Bat im yu, main brabli gud fren! Yu main wekinmeit en yunmi bin oldei jidan mijamet!
14Yunmi bin oldei toktok gija,
en yunmi bin oldei go weshipbat mijamet langa det Serramoni Pleis blanga God.
15Larram ol main enami olabat binijap kwikbala.
Larram olabat godan laibwan langa det pleis blanga ola dedbala pipul.
Olabat brabli wikitwan pipul en ola brabli nogudbalawei jidan insaid langa olabat hat, en tharran na meigim olabat kemp brabli nogudwan du.
16Bat mi jingat langa YAWEI det trubala God blanga album mi,
en im garra seibum mi.
17Ailibala, dinataim en naitaim, mi jingat en toktok langa im blanga main trabul en pein,
en im garra irrim mi.
18Im garra bringimbek mi seifwan brom det bigwan fait langa ol main enami olabat nomeda olabat jidan bigismob.
19God na, hu jidan bos olagijawan,
garra irrim mi en im garra bidim olabat,
dumaji olabat nomo wandi tjeinj,
en dei nomo gibit im rispek, najing.
20Main gudfren brom bifo bin fait langa im fren olabat,
en imbin breigim im ronwan pramis.
21Imbin swit tok,
bat im hat bin abum det nogudwan filing blanga heidimbat.
Ebri wed blanga im bin jis laik oil,
bat insaidwei detlot wed bin ardim jis laik shapwan naif.
22Libum ol yumob trabul langa YAWEI,
en im garra maindimbat yumob.
Im kaan larram enijing bidim detlot pipul hu jidan langa im raitwei.
23Bat yu na God garra meigim ol detlot pipul hu oldei medrimbat enibodi, en ol detlot laiyinbala pipul godan langa greib wen olabat stil yangbala en strongbala.
Bat mi, mi garra trastimbat yu.
Preya blanga trastim God