Dijan blanga det boswan blanga myusik. Deibid bin raidimdan dijan wen Neithan, det speshalwan mesinja blanga God bin kaman en dalim im imbin dum nogudbala ting garram Bethsheba.
Sekan Semyul 11:1-12:25
511Main God, mi askim yu blanga sori langa mi,
dumaji yu kaan neba stap laigimbat mi!
Dumaji yu laigim mi detmatj,
mi askim yu blanga rabumat ol detlot nogudbala ting aibin dumbat.
2Washim mi brabliwei brom ol detlot nogudbala ting.
Klinim mi brabliwei.
3Trubala, ai sabi aibin dum rong ting,
en mi oldei jinggabat ol detlot nogudbala ting aibin dumbat.
4Main God, aibin dum nogudbala ting langa yu.
Aibin dum det ting weya yu tok im nomo gudwan.
Blanga tharran na, yu rait wen yu tok aibin dum nogud ting,
en yu gibit feyago langa mi wen yu panishim mi.aRomans 3:4
5Trubala aibin jidan nogudwan brom det taim wen aibin deya insaid langa main mami binji,
en seimwei du aibin jidan nogudwan wen aibin bon.
6Ai sabi yu wandim mi blanga jidan brabli trubalawei insaid langa main spirit.
Yu titjim mi brabliwei wanim yu wandim mi blanga sabi en dum.
7Deigidawei ol main nogudbalawei,
en ai garra jidan klin.
Washim mi brabli klin,
en ai garra jidan klin brom ol main nogudbalawei.
8Ai wandim jidan gudbinjiwei igin!
Nomeda yubin panishim mi brabliwei,
yu meigim mi gudbinji igin!
9Jadimap yu ai, wulijim yu kaan luk ol detlot nogudbala ting main,
en rabumat ol detlot ting aibin dumbat wen ai nomo bin duwit langa yu.
10Main God, meigim mi nyu insaid.
Meigim mi jinggabat blanga ola gudwan ting.
11Nomo jandimwei mi.
Nomo deigidawei yu holi spirit brom mi.
12Meigim mi gudbinji laik aibin jidan basdam wen yubin seibum mi.
En meigim mi wandi duwit langa yu.
13If yu dum lagijat, wal ai garra dalim ola brabli nogudbala pipul wanim yubin dum,
en olabat garra tenim miselp en bulurrum yu.
14Main God, oni yu na gin seibum mi.
Larramgo mi fri dumaji aibin medrim det men.
If yu dum lagijat, ai garra jingat adbala en dalim pipul blanga ola gudbala ting yubin dum blanga mi.
15Main bos, album mi blanga tok strongbalawei,
wulijim ai garra dalim najalot pipul yu brabli gudwan.
16Ai sabi yu nomo wandim mi jis blanga barnim ship blanga sekrifais ofring blanga yu.
If ai oni barnim ship blanga ofring langa yu, tharran kaan meigim yu gudbinji.
17Main God, wen mi sori en meigim miselp lobala,
det taim na yu kaan andimwei mi.
Wen mi brabli sori en nomo jidan praudbala,
tharran na det gudwan sekrifais blanga yu blanga jidan gudbinji garram mi igin.
18Jidan brabli kainbala langa yu pipul olabat langa Jerusalem,
en album olabat bildimap det taun igin.
19If yu dum lagijat, wal ol yu pipul olabat garra jidan raitwei,
en yu garra gudbinji wen dei gibit yu ola gudbala ting, en ship en buligi,
en barnim olabat blanga weship langa yu.
God im jadjim pipul en im jidan brabli kainbala du

a51:4: Romans 3:4