Det femili blanga Kora bin raidimdan dijan song.
481YAWEI det trubala God im brabli haibalawan,
en pipul garra preisim im brabliwei langa det bigwan taun blanga wi God langa im seikridwan hil.
2Saiyan, det brabli bigwan hil blanga God, im jidan brabli haiwan en im brabli purdiwan.
Det taun Jerusalem blanga det brabli haibala king meigim pipul jidan brabli gudbinji ebriweya langa dijan wel.aMethyu 5:35
3God bin shoum im seifwan garram im deya insaid langa det taun garram bigwan wol raidaran.
4Ola king bin majurrumap miselp blanga kaman en fait langa Saiyan.
5Bat wen deibin luk, deibin brabli hatjamp,
en deibin bradin en bin ranawei.
6Deibin sheiksheik nomo lilbit en bin filim detmatj pein, jis laik gel wen im abum beibi.
7God bin smeshimap olabat jis laik strongwan win en rein smeshimap bigwan bout.
8Basdam wibin irrim wanim God bin dum,
en tudei na wibin luk wanim imbin dum iya langa dijan taun blanga YAWEI det boswan God blanga wi.
Im na garra kipum dijan taun seifwan olagijawan.
9God, insaid langa yu Serramoni Pleis melabat jinggabat blanga det filing weya yu laigimbat olataim.
10Ebribodi langa ebri kantri sabi yu, God, en dei oldei preisimbat yu.
Yu oldei gibit feyago langa ebribodi.
11Larram ola pipul brom Saiyan jidan gudbinjiwei!
Yu jadjim pipul raitwei.
Larram ola pipul langa ebri taun langa Juda jidan gudbinji.
12Yumob pipul blanga God, yumob wok raidaran langa Jerusalem en kaundimap ola haiwan haus.
13Yumob luk gudwei langa ola strongwan wol en detlot haiwan haus,
wulijim yumob gin dalim ol yumob bigininimob blanga dijan seifwan taun blanga God.
14Dijan God im jidan wi God olagijawan.
Im garra lidimbat wi raidap dis wel binij.
Im siliwan blanga trastimbat ola ritjwan ting

a48:2: Methyu 5:35