Deibid bin raidimdan dijan song.
371Nomo jidan nogudbinji blanga detlot nogudbala pipul hu dumbat rong ting,
en nomo teiknodis langa olabat.
2Olabat garra binij jis laik detlot gras weya draiyap en binij.
Dei garra dai jis laik detlot plent weya draiyap en binij.
3Trastim YAWEI en dum gudbala ting,
wulijim yumob garra jidan gudbinji en seifwan langa det kantri.
4Yumob garra luk langa YAWEI blanga meigim yumob jidan gudbinjiwei,
en im garra gibit yumob wanim yu wandim.
5Yumob garra gibit miselp langa YAWEI.
Yumob garra trastim im en im garra album yumob.
6Im garra meigim det raitwei blanga yumob shain wulijim det san wen im gidap ailibala,
en im garra meigim det feyagowei blanga yumob shain wulijim det san wen im dinataim.
7Nomo hatjamp. Yumob garra weit en wotjim wanim YAWEI garra dum.
Nomo wori blanga detlot pipul hu tokabat en dumbat nogudbala ting en meigim miselp ritjwan lagijat na.
8Nomo larram ol yu wori o det filing blanga gitwail teikoba langa yumob.
Tharran oni meigim trabul kamat.
9Detlot pipul hu trastim YAWEI garra gedim det kantri weya imbin pramis,
bat YAWEI garra binijimap ola nogudbala pipul.
10Dregli ola nogudbala pipul garra binijap.
Nobodi kaan luk olabat igin.
11Bat ola lobala pipul garra jidan langa det kantri,
en dei garra jidan gudbinjiwei garram ola ebrijing.aMethyu 5:5
12Detlot nogudbala pipul meigim plen snikinwei blanga detlot gudbala pipul,
en dei lukinat langa olabat garram wailwan feis.
13Bat YAWEI sabi en im laf langa detlot nogudbala pipul, dumaji im sabi olabat taim blanga binijap kaman gulijap na.
14Nogudbala pipul deigimat olabat bigwan naif en bendimbat olabat bo en erro blanga kilim ded ola powan pipul hu nomo garram enijing,
en blanga kilim ded ol detlot pipul hu dumbat rait ting.
15Bat dei garra gitkil garram olabat ron bigwan naif igin,
en olabat bo en erro garra breikap du.
16Im mobeda blanga jidan gudwei garram oni lilbit ting,
en nomo jidan nogudbalawei garram detmatj ebrijing,
17dumaji YAWEI garra deigidawei det pawa blanga ola nogudbala pipul,
en im garra albumbat ola gudbala pipul.
18YAWEI oldei maindimbat ol detlot pipul hu duwit langa im,
en olabat kantri garra jidan olagijawan blanga olabat.
19Nomeda olabat abumbat adtaim, bat stil olabat garra jidan gudbinjiwei,
en nomeda olabat kantri nomo abum eni rein, en im gulijap ranat blanga daga, bat stil olabat garra abum loda daga.
20Bat ola nogudbala pipul garra dai.
Detlot enami blanga YAWEI garra binij du, jis laik detlot wailwan purdiflawa.
Olabat garra binij jis laik det smok.
21Ol detlot nogudbala pipul oldei askimbat najalot pipul blanga enijing, bat dei nomo peiyimbek olabat,
bat detlot gudbala pipul gibitbat enibodi enijing gudbinjiwei.
22Ol detlot pipul weya YAWEI oldei gibit ola gudbala ting garra jidan langa det kantri,
bat YAWEI garra tok nogudbala wed langa najalot pipul en andimwei olabat brom det kantri.
23If yumob bulurrum det wei blanga YAWEI, wal im garra brabli gudbinji langa yumob en albumbat yumob.
24If yumob buldan yumob kaan stap deya, dumaji YAWEI garra album yumob en holdimap yumob garram im bingga.
25Mi brabli olmen na.
Aibin jidan iya longtaim, en aibin luk hau YAWEI bin oldei albumbat ol detlot pipul hubin oldei dumbat ola raitwan ting,
en olabat biginini olabat nomo bin jidan hanggriwan.
26Olabat oldei gibitat en lendimbat enijing langa najalot pipul,
en olabat biginini olabat oldei meigim olabat gudbinji.
27If yumob libum det nogudbalawei en jidan gudwei,
yumob biginini olabat garra jidan olagija langa det kantri,
28dumaji YAWEI im laigim det raitwei, en im nomo libum ol detlot pipul hu jidan trubalawei langa im.
Im oldei maindimbat olabat,
bat YAWEI garra andimwei detlot biginini blanga ol detlot nogudbala pipul.
29Ol detlot pipul hu jidan raitwei langa YAWEI,
olabat na garra jidan olagijawan langa det kantri.
30Olabat oldei tok sabibalawei en dei oldei gibit ebribodi feyago.
31Olabat oldei jinggabat det lowa blanga YAWEI langa olabat hat,
en olabat kaan libum det gudwan roud.
32Ola nogudbala pipul oldei wotjimbat ola gudbala pipul blanga kilim olabat ded,
33bat YAWEI im langa olabat said, en wen olabat go langa kot im album olabat, dumaji olabat nomo gilti.
34Trastim YAWEI en bulurrum im,
en im na garra meigim yumob haibala en gibit yumob det kantri,
en yumob garra luk detlot nogudbala pipul ol binijap.
35Aibin luk wanbala men hubin jidan brabli nogudwan, en imbin oldei dumbat krulbala ting langa najalot pipul.
Imbin jidan strongwan laiga bigwan tri langa gudwan graun.
36Bat afta im nomo bin deya.
Aibin lukabat im bat ai nomo bin faindim im.
37Yumob luk ola gudbala pipul weya jidan raitwei langa YAWEI.
Olabat femili olabat jidan gudbinjiwei,
38bat YAWEI garra binijimap ola nogudbala pipul,
en olabat biginini olabat du.
39YAWEI im seibum ola gudbala pipul,
en lukaftumbat olabat wen olabat abumbat trabul.
40YAWEI im album en seibum olabat brom ola nogudbala pipul,
dumaji olabat go langa im blanga kipum olabat seif.
Sikwan men askim God blanga album im

a37:11: Methyu 5:5