Deibid bin raidimdan dijan song.
341Ai garra oldei preisim YAWEI det trubala God.
Ai garra kipgon dalimbat im oldei, “Main God, yu brabli haibala!”
2Ai garra tok, “YAWEI, im gudwan en brabli haibala!”
Detlot pipul hu abumbat trabul garra irrim en jidan gudbinji.
3Yumob pipul joinin garram mi en dalim YAWEI im haibala.
Wi garra preisim YAWEI mijamet.
4Aibin lukaranbat blanga YAWEI blanga album mi,
en imbin album mi.
Imbin seibum mi brom detlot ting weya bin bradinim mi.
5Yu trastim langa YAWEI du en jidan gudbinji.
Wen yu go langa im,
yu enami olabat kaan bidim yu en meigim yu sheim.
6Wen aibin abum trabul,
en ai nomo bin sabi wanim mowa blanga dum,
aibin jingat langa YAWEI.
Imbin irrim mi,
en imbin seibum mi brom ol detlot trabul.
7Det einjul blanga YAWEI wotjimbat detlot pipul hu abum rispek langa YAWEI.
Im seibum olabat brom ola trabul.
8Yumob kaman langa YAWEI ol yumob pipul blanga im,
en faindat im brabli switwan.
Wen pipul askim im blanga lukaftum olabat, dei jidan gudbinji.aFes Pida 2:3
9Ol yumob pipul blanga YAWEI, yumob garra rispek langa im.
Wen enibodi rispek YAWEI, dei kaan jidan nomo garram enijing.
10Wen det laiyan go hanting, im jidan hanggri wen im nomo faindim eni daga,
bat wen wi duwit langa YAWEI, im kaan libum wi nomo garram eni gud ting.
11Yumob pipul hu kaman langa mi blanga len, yumob irrim mi.
Ai garra titjim yumob det raitwei blanga jidan wen yumob rispek YAWEI.
12If yumob wandi abum gudwan laif,
en if yumob wandi kipgon jidanbat laibala gudbinjiwei,
13wal yumob kaan tokabat pipul nogudwei en dalimbat laiya!
14Yumob tenim miselp brom dumbat ola nogud ting,
en yumob dum ola gudwan ting.
Yumob jidan hepiwei,
en yumob trai kipgon jidanbat lagijat olataim.
15YAWEI oldei lukaftumbat detlot pipul hu bulurrum im.
En wen dei jingat langa im, im oldei irrim.
16Bat YAWEI im wail langa detlot pipul hu oldei dumbat nogud ting.
Im garra binijimap olabat,
en pipul garra fogedabat olabat olagija.bFes Pida 3:10-12
17Bat detlot pipul hu bulurrum YAWEI brabliwei,
wen olabat abum trabul en jingat langa im,
im seibum olabat brom ol detlot trabul.
18YAWEI im jidan gulijap langa detlot pipul hu jidan nogudbinji insaid langa olabat hat.
Im garra album detlot pipul na wen najalot pipul gibit olabat adtaim.
19Det sambodi hu bulurrum YAWEI garra abum adtaim samtaim.
Detlot najalot pipul garra meigim loda trabul blanga im,
bat YAWEI garra album im.
Im garra kipum im seif olataim.
20Im garra lukaftum im,
wulijim nobodi kaan breigim im boun.cJon 19:36
21Bat wen ola nogud pipul dum nogud ting,
wal dei garra binij brom detlot nogud ting.
YAWEI garra panishim ol detlot pipul hu nomo laigim im gudbala pipul olabat.
22Bat im garra seibum im wekinmen olabat.
Im kaan panishim detlot pipul hu trastimbat im blanga kipum olabat seif.
Preya langa God blanga album wi

a34:8: Fes Pida 2:3

b34:12-16: Fes Pida 3:10-12

c34:20: Jon 19:36