Preya blanga Deibid. Imbin pudumdan dis preya langa det taim wen im enami bin meigim detmatj trabul blanga im. Im nomo bin fil seif, en imbin fil jis laik imbin jidan langa dak pleis nomo garram lait.
271YAWEI det trubala God, im jis laiga lait blanga mi.
Im gin seibum mi.
Wotfo mi oldei bradin?
YAWEI im strongwan blanga lukaftumbat mi.
Ai kaan bradin blanga enijing.
2Wen main enami olabat lukabat blanga mi,
en wen detlot nogudbala pipul wandi kilim mi jis laik detlot dinggo wandi kilim en dagat enimul,
wal detlot enami na garra buldan.
Olabat na detlot pipul hu garra gitkil.
3Nomeda detlot solja raidaran langa mi,
ai kaan bradin.
Nomeda dei wandi fait langa mi,
bat ai garra gudbinji.
4Ai wandi go langa YAWEI langa im serramoni pleis.
Ai wandi askim im blanga wanbala ting.
Ai wandi jidan gulijap langa im olataim.
Ai wandi jidan gulijap langa YAWEI hu lukaftum im pipul kainbalawei.
En ai wandi askim im blanga shoum mi det raitwei.
5Wen trabul kaman YAWEI gin blandim mi langa seifwan pleis.
Im gin blandim mi langa im Serramoni Pleis.
Im gin pudum mi langa haibala ston,
weya nobodi gin gajimap mi.
6Im gin meigim mi win lagijat na,
en ai gin lukdan deya langa main enami olabat.
Afta, ai garra gudbinji detmatj.
Ai garra jingat wen ai go langa det Serramoni Pleis blanga deigim ofring blanga YAWEI.
Ai garra sing en ai garra preisim im.
7YAWEI, lisin langa mi.
Mi jinginat langa yu.
Yu sori langa mi en ensim mi!
8Aibin jinggabat miselp,
“YAWEI bin dalim mi blanga kaman gulijap langa im,
en blanga tharran na mi kaman gulijap langa im.”
9YAWEI, nomo blandim miselp brom mi.
Yu kipgon lisinbat langa mi.
Nomo wail langa mi, yu wekinmen.
Yubin albumbat mi bifo.
Nomo libum mi.
Nomo fogedabat mi.
Yu na det God hubin seibum mi.
10If main dedi en main mami libum mi olagija,
wal yu na YAWEI garra lukaftum mi.
11Titjim mi wanim yu wandim mi blanga dum, YAWEI.
Lidim mi langa det streitwan roud,
wulijim detlot enami gin luk mi langa det raitwan roud.
12Dei dalimbat ola laiya blanga mi.
Dei tok, “Wi garra kilim im!”
Nomo larram olabat blanga bidim mi!
13Ai bilib brabliwei ai garra jidan laibala.
YAWEI im kainbala en im garra album mi iya garram detlot laibala pipul.
14Trubala, ai dalim yumob, yumob garra trastim YAWEI!
Jidan strongbala en nomo bradin!
Trastim YAWEI!
Preya blanga album