261YAWEI, yu dalim olabat ai nomo garram eni rong.
Aibin oldei jidan trubalawei,
en aibin oldei trastim yu brabliwei.
2YAWEI, luk langa main laif blanga faindat if ai garram eni rong filing en if mi jinggabat enijing rongwei.
3Mi sabi yu oldei kipgon laigimbat mi.
Tharran na shoum mi blanga jidan langa det raitwei.
Mi sabi yu oldei jidan brabli trubalawan.
Tharran na album mi blanga sabi wujei blanga go.
4Detlot pipul hu oldei jidanbat langa olabat ronwei,
olabat nomo main fren.
Ai nomo heingaran garram detlot tufeis pipul.
5Ai nomo joinin garram pipul hu oldei dumbat nogudwan ting.
Mi jidan longwei brom olabat.
6-7YAWEI, mi washim main bingga blanga shoum ai nomo bin dum eni rong,
en mi weship yu langa det seikridwan haus blanga yu.
Mi singim theingkyu song langa yu blanga ola gudwan ting weya yubin dum.
8YAWEI, mi laigim brabli wen mi gowin langa yu haus weya yu jidan,
langa det pleis na weya yu pawa im jidan,
en weya yu shain nomo lilbit.
9Nomo kilim mi garram detlot nogudwan pipul.
Nomo kilim mi garram detlot pipul hu oldei medrimbat.
10YAWEI, yu oldei panishim ola pipul hu dumbat nogudwan ting.
Yu panishim detlot pipul hu oldei gedim mani brom najalot pipul blanga dum nogudwan ting.
Nomo panishim mi du garram detlot nogud pipul.
11Wal mi na oldei dumbat rait ting.
YAWEI, yu kain langa mi en seibum mi.
12Tudei mi jidan langa seifwan pleis na.
YAWEI, wen mi joinin langa yu pipulmob,
ai garra preisim yu.
Preya blanga gibit preis