Deibid bin raidimdan dijan preya.
221Main God, main God, wotfo yubin libum mi?
Wotfo yu jidan longwei brom mi?
Mi jingat langa yu.
Wotfo yu nomo album mi?aMethyu 27:46; Mak 15:34
2Deitaim en naitaim mi jingat langa yu, main God,
bat yu nomo ensim mi, najing, en mi nomo abum spel.
3Bat yu na det holiwan God, en yu jidan det brabliwan bos,
en yu pipul langa Isreil oldei preisimbat yu.
4Melabat grengrenfatha olabat bin trastim yu.
Olabat bin trastim yu en yubin seibum olabat.
5Olabat bin jingat langa yu en yubin seibum olabat.
Olabat bin trastim yu en yubin album olabat.
6Pipul tok mi rabishwan en reken mi jidan laiga wem, nomo laiga brabli men.
Olabat oldei meigim fan langa mi en oldei heidimbat langa mi.
7Wen enibodi luk mi, olabat mokimbat mi.
Olabat pokimat olabat tang en sheikim olabat hed.bMethyu 27:39; Mak 15:29; Luk 23:35
8Olabat tok, “Yu oldei go langa YAWEI blanga ebrijing.
Wotfo im nomo seibum yu?
If YAWEI laigim yu, wotfo im nomo album yu?”cMethyu 27:43
9Bat yu na bin kipum mi seifwan wen aibin bon,
en wen aibin beibi yubin kipum mi seifwan du. 10Brom det dei wen aibin bon, yubin oldei maindimbat mi.
Yubin oldei jidan main God.
11Nomo jidan longwei brom mi God.
Det trabul im gulijap en nobodi iya blanga album mi.
12Loda enami jidan raidaran langa mi jis laik ola wailwan bul.
Olabat raidaran langa mi, jis laik ola wailwan bul brom det kantri gulum Beishan.
13Olabat jis laik detlot laiyan weya jingat adbala redi blanga dagat mi.
14Mi nomo strongbala enimo na, jis laik woda wen spil langa graun en im binij.
Mi gulijap binij du, jis laiga kendul weya meltap.
Ai nomo garram bodi en ol main boun slekwan en bin kamat na.
15Main maus im draiwan jis laik brabli draiwan graun.
Mi brabli thestiwan.
Yubin libum mi blanga dai langa graun.
16Main enami olabat bin kaman brom ebriweya en jadimap mi jis laik ola wailwan dog,
en deibin jalk main bingga en fut.
17Mi bouniwan na,
en main enami olabat lukinatbat mi brabliwei.
18Olabat bin deigidawei main klos en olabat bin kadimat gija,
en deibin gembul blanga main shet.dMethyu 27:35; Mak 15:24; Luk 23:34; Jon 19:24
19YAWEI, nomo jidan longwei brom mi.
Yu kaman kwikbala blanga album mi,
en yu meigim mi jidan strongbala.
20Seibum mi brom detlot bigwan naif blanga ol main enami.
Seibum main laif brom ol main strongwan enami. Olabat jis laik detlot wailwan dog.
21Ol main enami jidan brabli krulbala.
Seibum mi brom olabat.
Olabat jis laik detlot wailwan bul en laiyan.
22Ai garra dalim main pipul wanim yubin dum.
Wen olabat majurrumap miselp, ai garra preisim yu rait deya langa olabat.eHibrus 2:12
23Yumob pipul hu wek blanga YAWEI, yumob preisim im.
Yumob ola femili blanga Jeikob, yumob gibit rispek langa im.
Yumob pipul blanga Isreil, yumob weship im.
24YAWEI nomo tridim ola powan pipul rabishwei,
en im nomo jis libum olabat lagijat igin wen olabat ardimbat.
Im nomo tenawei brom olabat. Im ensim olabat wen dei jingat langa im blanga album olabat.
25YAWEI, lida langa ebribodi, ai garra preisim yu blanga wanim yubin dum.
En deya na wen dei weshipbat yu, ai garra gibit sekrifais ofring weya aibin pramis.
26Ola powan pipul garra dagat blendibala daga raidap dei bulap.
Wen pipul kaman langa yu YAWEI, dei garra preisim yu.
God, yu oldei gibitbat olabat ola gudbala ting.
27Pipul langa ebri kantri garra jinggabat langa YAWEI en dei kaman langa im.
Ola traib langa ebri kantri garra weship langa im.
28YAWEI det trubala God im brabli bos,
en im jidan bos langa ebri kantri.
29Ola pipul hu jidan praudbalawei garra nildan lida langa im.
Nobodi kaan seibum olabat ronwan laif. Olabat garra ol nildan lida langa im.
30Ol detlot pipul hu garra kaman biyain langa wi garra wek blanga YAWEI,
en olabat garra dalim olabat biginini olabat blanga im.
31Detlot pipul hu nomo bin bon yet garra kipgon tok,
“YAWEI det trubala God bin seibum im pipul olabat.”
God im det stakmen blanga wi

a22:1: Methyu 27:46; Mak 15:34

b22:7: Methyu 27:39; Mak 15:29; Luk 23:35

c22:8: Methyu 27:43

d22:18: Methyu 27:35; Mak 15:24; Luk 23:34; Jon 19:24

e22:22: Hibrus 2:12