Deibid bin raidimdan dijan song blanga det boswan blanga ola myusik.
201Larram YAWEI det trubala God ensim yu preya wen yu abum trabul.
Larram im neim, det God blanga Jeikob, kipum yu seifwan.
2Larram im kaman brom im seikridwan haus deya langa det bigwan hil gulum Saiyan en album en seibum yu,
en gibit yu wanim yu wandim blanga album yu.
3Larram YAWEI jinggabat ola ofring brom yu gudbinjiwei,
en jidan gudbinji garram ol yu barnapwan sekrifais ofring du.
4Larram im gibit yu wanim yu wandim,
en meigim detlot ting weya yu jinggabat blanga dum hepin.
5En wen yu win melabat garra jingat gudbinjiwei,
en sing en dens blanga preisimbat wi God.
Larram YAWEI ensim yu blanga ebrijing yu oldei wandimbat.
6Wal ai sabi na YAWEI oldei seibum det king weya imbin pikimat.
Brom im holiwan pleis langa hebin im irrim im en album im,
en garram im strongwan pawa im meigim im win brabliwei.
7Sambala pipul oldei trastimbat olabat wegan en hosis weya dei yusumbat langa wo,
bat melabat oldei trastimbat det pawa blanga YAWEI det God blanga melabat.
8Detlot pipul hu trastimbat olabat hosis en bagi kaan win,
bat melabat garra jandap strongbala en bidim melabat enami olabat.
9YAWEI, yu meigim det king win,
en ensim melabat wen melabat jingat langa yu.
Preisim God dumaji imbin bidim im enami olabat