191Ebrijing langa skai im dalim wi det stori weya God im brabli haibalawan.
Trubala orait, ebrijing langa skai im shoum wi wanim God bin dum.
2Ebridei kaman, wi sabi igin God im brabli haibalawan.
Ebrinait kaman, im dalim wi det seimwan stori igin blanga God.
3Ol dislot kaan tok langa wi en wi kaan lisin olabat,
4bat pipul ebriweya sabi det stori brom dislot ting.
Det stori im shoum miselp langa pipul langa ebri kantri.
God bin meigim pleis langa skai blanga det san.aRomans 10:18
5Wen im ailibala det san im kamat brom im pleis,
jis laik det yangbala men hubin jis git merrit.
Im jis laik strongwan men redi blanga ran det reis.
6Det san im gidap wansaid,
en godan najasaid langa det skai.
Nobodi kaan haidim miselp brom det san.
Det lowa blanga YAWEI det trubala God
7Det lowa blanga YAWEI nomo garram enijing rong.
Im meigim wi strongbala igin.
Wi gin trastim det wed blanga YAWEI.
Blanga im lowa im meigim pipul sabi det raitwei.
8Blanga im lowa im jidan rait olawei.
Ol detlot pipul hu teiknodis langa det lowa,
im meigim olabat jidan gudbinji.
Det lowa blanga YAWEI nomo garram enijing rong.
Im meigim wi sabi im wei brabliwei.
9Wen wi gibit rispek langa YAWEI im brabli gudwan tharran deya.
Wi garra kipgon olataim gibitbat rispek langa im.
Det lowa blanga YAWEI im brabli trubalawan.
Im oldei gibit pipul feyago.
10Det lowa blanga YAWEI im mowa gudwan langa brabli gudwan gol.
Det lowa im brabli switbalawan,
mowa switwan langa det brabli nyuwan shugabeig.
11Det lowa blanga im dalim wi wanim wi garra dum.
Wen wi teiknodis langa im lowa im gibit wi ola gudwan ting.
12Ai kaan sabi blanga main nogudbalawei.
YAWEI, yu sori langa mi en deigimwei detlot nogudwan ting weya ai nomo bin sabi aibin oldei dumbat.
13Nomo larram mi dumbat detlot nogudwan ting weya mi sabi olabat rong.
Nomo larram ola nogud ting jidan bos blanga mi.
If yu meigim mi lagijat wal ai garra jidan brabli gudwan,
en jidan friwan brom ola nogudbalawei.
14YAWEI, larram ebrijing mi tok,
en ebrijing mi jinggabat,
meigim yu gudbinji.
Yu na kipumbat mi seifwan,
en yu na bin seibum mi.
Preya langa God blanga album det king blanga bidim im enami olabat

a19:4: Romans 10:18