1481Preisim YAWEI det trubala God!
Preisim YAWEI ol yumob hu jidan langa hebin.
2Preisim im, ol im einjul hu wek blanga im deya langa hebin.
3Preisim im, san en mun.
Preisim im, ola shainiwan sta.
4Preisim im, haiwan skai, en ola woda ontop langa skai.
5Larram olabat holot preisim det neim blanga YAWEI.
Imbin tok, en imbin meigim olabat.
6Garram im wed imbin meigim ebrijing jidan langa olabat raitwan pleis olagijawan,
en tharran na kaan neba tjeinj.
7Preisim YAWEI, ola solwoda langa dijan wel,
en ola bigwan enimul en ebrijing weya jidan raitdan langa bodam langa solwoda.
8Preisim YAWEI ola laitining en heilston en sno en ola klaud en ola strongwan win hu teiknodis langa im wed.
9Preisim YAWEI ola hil en ola bigwan hil,
en ola frut tri en ola tri langa bush.
10Preisim YAWEI ola wailwan en kwaitwan enimul,
en ola enimul weya kraulkraul, en ola bard weya flaiflai.
11Preisim YAWEI ola king en ola pipul,
en ola boswan langa ebri kantri.
12Preisim YAWEI ola yanggel en ola yangboi,
en ola ol pipul en ola biginini du.
13Larram olabat holot preisim det neim blanga YAWEI!
Im neim im mowa haibalawan langa ola najalot neim.
Im jidan mowa haibalawan langa dijan wel en langa hebin.
14Imbin meigim im pipul olabat jidan strongbala blanga preisim im.
Olabat na detlot Isreil pipul hu im laigim brabliwei.
Preisim YAWEI det trubala God!
Dijan preis song