1471Preisim YAWEI det trubala God!
Im brabli gudwan blanga sing preis song langa wi God.
Im brabli gudwan en det raitwei blanga preisim im.
2YAWEI im bildimbek Jerusalem.
Im bringimbekbat detlot pipul hubin jidan prisana langa streinja kantri.
3Detlot pipul hu jidan brabli nogudbinji, im meigim olabat jidan gudbinji igin,
en im taiyimap olabat sowa garram bendij.
4Imbin jinggabat haumeni sta garra jidan,
en imbin gulum olabat ronwan neim.
5Blanga wi God im brabli haibalawan en strongbalawan.
Im sabi blanga ebrijing.
Wi kaan sabi brabli blanga im wei.
6Im album ola lobala pipul,
bat im tjakamdan ola nogudbala pipul langa graun.
7Sing preis song langa YAWEI,
en plei myusik garram gita langa wi God.
8Im pudum ola klaud ebriweya langa skai.
Im meigim rein buldan langa dijan kantri,
en im meigim gras gro ebriweya langa ola hil.
9Im gibit daga langa ola enimul,
en wen ola bard jingat im gibit olabat daga.
10Pipul trastimbat ola strongwan hosis,
en ola solja hu nomo bradin blanga enijing langa fait,
bat YAWEI nomo laigim detkain pipul.
11Bat im jidan gudbinji langa detlot pipul hu gibit im rispek,
en hu trastim langa im olagijawan filing blanga laigimbat olataim.
12Pipul blanga Jerusalem, preisim YAWEI!
Preisim yu God, Saiyan!
13Im meigim strongbala ola geit blanga yu, Jerusalem,
en im dum ola gudwan ting langa ol yu pipul olabat.
14Im nomo larram enibodi kaman en fait langa yu,
en im meigim ebribodi jidan sedisfaid garram ola brabli gudwan sid daga.
15Im gibit oda langa dijan graun, en im duwit streidawei.
16Im spredimat sno, seimwei laik yu spredimat bleingkit,
en im meigim det waitwan ais jidan ebriweya langa graun.
17Im jandimdan heilston wulijim ston.
Nobodi kaan jidan womwan wen im jandim det kolwetha.
18Brom deya im tok en ola ais meltap.
Im jandim win en det woda im stat randan.
19Imbin gibit im wed en ol im lowa langa im pipul olabat langa Isreil.
20Im nomo bin dum lagijat blanga najalot pipul brom najalot kantri.
Dei nomo sabi ol im lowa.
Preisim YAWEI det trubala God!
Ebrijing preisim YAWEI