1461Wi garra preisim YAWEI det trubala God.
Garram main laif holbit, ai wandi preisim YAWEI.
2Ai garra preisimbat YAWEI raidap ai binij.
Ai garra sing langa main God olawei wen mi jidan laibala.
3Nomo trastim detlot pipul hu jidan boswan o najalot pipul,
dumaji olabat jis pipul en dei kaan seibum yu.
4Wen olabat binijap, dei berrim olabat.
En afta, ebrijing olabat bin jinggabat blanga dum garra ol binij du.
5YAWEI, det God blanga wi grenfatha Jeikob,
im na album wi wen wi trastim en weship langa im.
Dumaji im lagijat wi jidan hepiwan.
6YAWEI na bin meigim det skai, graun, woda en ola ebrijing weya jidan langa olabat.
Im oldei dum wanim imbin pramis.aEks 4:24; 14:15
7YAWEI oldei dum wanim rait blanga detlot pipul wen enibodi dum nogudbala ting langa olabat.
Im gibit daga langa detlot pipul hu jidan hanggriwan.
Im album detlot pipul hu garram enikain trabul,
jis laik sambodi larramgo olabat fri brom jidanbat prisana.
8Im meigim blainwan pipul luk.
Im album detlot pipul hu garrimap hebiwan loud brom najalot pipul.
Im laigim detlot pipul hu bulurrum det wei blanga im.
9YAWEI lukaftumbat ola powan streinja pipul.
Im lukaftumbat detlot biginini en widogel hu nomo garram enibodi blanga lukaftum olabat.
Im meigim det laif go nogud blanga ola nogudbala pipul.
10Trubala YAWEI garra jidan bos olagijawan.
YAWEI det God blanga ola pipul langa Jerusalem garra jidan bos blanga wi olagijawan.
Wi garra preisim YAWEI det trubala God.
Dijan blanga preisim God det Haibalawan

a146:6: Eks 4:24; 14:15