Deibid bin raidimdan dijan song.
1451Ai garra dalimbat blanga det haibalawei blanga yu, main God, en main king,
Ai garra gibitbat theingks langa yu olagijawan.
2Ai garra gibitbat theingks langa yu ebridei.
Ai garra preisim yu olagijawan.
3YAWEI im haibalawan en pipul garra preisim im neim brabliwei.
Nobodi nomo sabi brabli det haibalawei blanga im.
4Ola pipul en olabat biginini hu garra jidan bambai garra preisim yu blanga wanim yubin dumbat.
Olabat na garra toktokbat blanga ola brabli gudwan ting yubin oldei dumbat.
5Olabat garra toktok blanga yu pawa en blanga yu haibalawei.
Ai garra jinggabat ol detlot brabli gudbala ting yubin oldei dumbat.
6Ola pipul garra toktok blanga ola ting weya yubin dumbat,
en ai garra dalimbat ebribodi blanga yu haibala pawa.
7Olabat garra dalimbat blanga detlot gudbala ting blanga yu,
en olabat garra sing song blanga det kainbalawei blanga yu.
8YAWEI laigim pipul en im garram soriwan filing blanga olabat.
Im nomo gitwail kwikbala en olataim im garram det filing blanga laigim pipul olagijawan.
9YAWEI im gudbala langa ebribodi.
Im kainbala langa ebrijing weya imbin meigim.
10Ebrijing yubin meigim garra preisim yu YAWEI,
en ola pipul blanga yu garra gibit theingks langa yu.
11Olabat garra tok blanga hau yu jidan haibalawan bos,
en dalimbat blanga yu strongwan pawa,
12wulijim ebribodi garra sabi blanga ola gudbala ting yubin dum,
en blanga det haibala pleis weya yu jidan boswan.
13Det haibala pleis garra jidan olagijawan, en yu garra jidan boswan olagijawan.
YAWEI oldei kipum im wed trubalawei.
Im dum ebrijing garram kainbalawan filing.
14Im album detlot pipul hu abumbat trabul,
en im lidimap detlot pipul hu buldan.
15Ebrijing laibala luk langa yu blanga album olabat,
en rait taim yu gibit olabat daga.
16Yu gibit olabat naf ebrijing,
en yu meigim olabat sedisfaid brabli.
17YAWEI oldei dum ebrijing raitwei,
en im dum ebrijing garram kainbalawan filing.
18Im oldei jidan gulijap langa ol detlot pipul hu jingat langa im,
en langa ol detlot pipul hu prei langa im garram trubalawan hat.
19YAWEI oldei gibit ebrijing langa ol detlot pipul hu rispek im.
Im irrim olabat wen dei jingat langa im en im seibum olabat.
20Im lukaftum ol detlot pipul hu laigim im,
bat im garra binijimap ol detlot brabli nogudbala pipul.
21Ai garra preisim YAWEI olataim.
Larram ebrijing imbin meigim garram im ronwan wed preisimbat im holiwan neim olagijawan.
Preisim YAWEI det gudbala God