121Album melabat YAWEI!
Ola gudwan pipul ol gon na.
Tudei yu kaan faindim pipul lagijat enimo hu jidan trubalawei.
2Detlot nogudbala pipul dalim gija laiya.
En wen dei tok gija blanga enijing dei bilib gija du.
3YAWEI yu meigim jidan kwait detlot pipul hu oldei tok laiyawei.
Yu jadimap maus blanga ol detlot pipul hu tok praudwei.
4Dei oldei tok lagijat, “Wi gin gedim enijing wi wandim,
en wi gin tok blanga enijing wi wandim.
Wi nomo garram bos.”
5YAWEI im tok lagijat, “Wal ai garra gidap na.
Ola powan pipul en najalot pipul abumbat adtaim brom nogudbala pipul.
Aibin lisin olabat jingat langa mi,
en ai garra album olabat na.”
6Ola pramis blanga YAWEI jidan truwan en ola pipul gin trastim tharran na.
Detlot pramis jidan trubala nomo garram eni rong,
jis laik det gol ston weya deibin barnim brabliwei garram hotwan faiya blanga meigim kamat shainiwan.
7-8Nogudbala pipul jidan ebriweya,
en ebribodi tok gudwei blanga ola brabli nogudbalawei.
YAWEI, kipum melabat seifwan, en kipumwei detkain nogudbala pipul brom melabat.
Mi jingat langa YAWEI blanga album mi