Deibid bin raidimdan dijan song.
111-2Mi oldei trastim YAWEI blanga kipum mi seif.
Wotfo yu tok langa mi blanga ranawei jis laik bard weya flaiwei langa bigwan hil blanga jidan seifwan?
Im trubala orait detlot nogud pipul redi blanga shudum erro.
Brom det dakwan pleis dei weidabat blanga kilimbat ola gudwan pipul.
3Wen nogud pipul meigim ebrijing rong,
wanim ola gudwan pipul gin dum? Najing!
4YAWEI, im jidan langa im seikridwan pleis.
Im jidan bos langa hebin.
Im wotjimbat pipul ebriweya en im sabi wanim olabat dumbat.
5Im luk ola gudwan pipul en ola nogudwan pipul seimwei.
Im nomo laigim ola jigiwan pipul brabliwei.
6Im garra jandimdan hotwan eshis en smok garram nogudwan smel langa ola nogudwan pipul.
Im garra panishim olabat garram brabli hotwan win.
7YAWEI nomo garram eni rong langa im,
en im laigim gud ting weya pipul dum.
Detlot hu dum lagijat na garra luk im.
Dijan preya blanga albumbat ola pipul blanga God