Det boswan God
401-2Wal YAWEI det trubala God bin kipgon tok, “Job, mi na det boswan God, bat yubin tok langa mi en yubin tok mi nomo rait, mi rong. Wal yu garra lafta ensim langa mi na.” Lagijat na YAWEI bin tok.
3Wal Job bin tok langa YAWEI, 4“Hu mi, en hau ai garra ensim yu? Mi nomo enijing. 5Olredi aibin tok tumatj en ai kaan tok enimo na.” Lagijat na Job bin tok.
6Wal brom det saiklon YAWEI bin tok langa Job, 7“Yu luk langa mi en yu ensim dislot kwestjan ai askimbat yu. 8Yu trai pudum bleim langa mi wen yu tok yu nomo gilti en reken mi nomo oldei gibit yu feyago? 9Yu reken yu garram brabli strongbala am wulijim mi? Yu reken yu gin jinginat adbala laik det thanda wulijim mi? 10If yu garram detmatj pawa, wal yu werrimon detlot speshalwan klos wulijim ola pipul garra sabi yu na det king. 11-12En yu meigim detlot brabli praudbala pipul jidan brabli lobala en yu nokamdan olabat, 13en yu gaburrumap olabat insaid langa det graun, en libum olabat langa det wel weya detlot dedbala pipul oldei jidanbat. 14If yu dum dijan, wal mi na garra preisimbat yu, dumaji yubin win dijan agamin.”
YAWEI bin meigim hipopodimas en Job du
15Wal YAWEI bin kipgon tok, “Yu luk det bigwan enimul gulum hipopodimas. Aibin meigim im, en aibin meigim yu du. Nomeda im oldei dagadagatbat gras wulijim buligi, 16bat stil im garram brabli strongbala bodi, 17en im teil im jandap wulijim det sidatri, en im leig, im brabli strongbala. 18Blanga im boun im brabli strongbala wulijim kopa o aiyan.
19“Aibin meigim im mowa strongbala langa najalot enimul, bat mi mowa strongbala langa im. 20Im oldei dagat grinwan gras kwaitbala en ola najalot enimul oldei pleipleibat gulijap langa im. 21-22Im oldei leidanbat andanith langa det sheid tri wansaid langa ribasaid, o samtaim im oldei haidim miselp langa detlot longwan gras insaid langa woda. 23Im nomo bradin blanga det woda wen im randan brabli kwikbala. Im jidan kwaitbala wen det woda brom det Jodan Riba oldei randan langa im feis. 24Yu sabi enibodi hu gin gajim im en meigim im ai dubala blainwan o gin trepam im en grebum im langa im nos?”