Elifas en Job bin tok gija
41Wal Elifas brom det kantri gulum Teman bin tok langa Job, 2“Yubin toktok longtaim na. Wal yu weit en irrim wanim ai garra tok basdam, en nomo gitwail kwikbala. 3-4Yu jinggabat ol detlot wed wen yubin dalim ol detlot pipul wen olabat bin wandim yu blanga albumbat olabat. Nomeda olabat bin buldanbuldanbat en deibin brabli wikwan, bat stil blanga yu wed bin oldei meigim olabat jandap strongbala. 5Wotfo yu brabli nogudbinji wen trabul bin kaman langa yu? 6Yubin laigim God en yu oldei jidan raitwei garram im. Wal yu lafta kipgon trastimbat langa im en nomo gibap.
7“Wal yu jinggabat na. Nomo eni trubala en gudbala men bin dai wen olabat bin stil brabli yangbala. 8Langa main taim, oni detlot hubin dumbat nogudbala ting bin abum trabul en det seimwan nogudbala ting bin hepin langa olabat du. 9En God bin gitwail langa olabat en imbin tjakidawei olabat. 10Nogudbala pipul jis laik det laiyan wen im meigim nois, bat if det laiyan nomo garram eni tuth, im kaan dagadagatbat enijing, 11en im kaan kilim eni wailwan enimul blanga dagadagatbat, en detlot lilwan laiyan garra ranawei en dai.”
Sambodi bin tok langa Elifas kwaitbalawei
12Wal Elifas bin kipgon tok langa Job, “Sambodi bin tok langa mi brabli kwaitbalawei 13wen aibin silip, bat main drim bin bradin mi.aJob 33:15 14Aibin sheiksheikbat nomo lilbit, 15en ol main heya bin ol jandap, jis laik wen det win bin bloblo gulijap langa main feis. 16Imbin stap, en imbin jandap kwaitbala na, en aibin luk samting jis laik sambodi bin kaminap. En wen imbin jidan kwaitwan, aibin irrim det sambodi tok, 17‘Nomo enibodi jidan gudbala langa God hubin meigim olabat. 18Im oldei faindim nogudbala ting langa im einjulmob en im nomo trastimbat langa olabat. 19Ai sabi wanim yu toktokbat im trubala. God reken nomo enibodi gudbala. Imbin meigim olabat jis laik det sofwan badaflai weya sambodi kilim im ded wen im luk im. 20Seimwei du garram pipul. Maitbi wanbala men jidan laibala moningtaim, en im dai naitaim. En nobodi nomo sabi im enimo. 21Imbin libum dijan laif, jis laik det tent weya dei pulumat detlot tent peig en im buldan. En im nomo bin sabi det wei blanga God.’ Lagijat na det sambodi bin tok.”

a4:13: Job 33:15