YAWEI bin tok brom det saiklon
381Wal brom det saiklon YAWEI det trubala God bin tok langa Job, 2“Wotfo yu oldei tok detmatj wen yu nomo sabi enijing? 3Yu gitredi blanga luk mi feis du feis na. Yu reken yu gin ensim ola kwestjan mi askim yu? 4Hau aibin meigim dijan wel? Yubin deya wen aibin meigim dijan graun? 5Yu sabi hubin spredimat en meshurum dijan wel? 6Wanim holdimap dijan graun blanga jidan gudwei? Hubin lainimap ola ston langa ola kona langa dijan wel? 7Ailibala langa det taim na ola sta bin sing, en ola einjul bin preisimbat mi gudbinjiwei. 8Hubin meigim det solwoda stap langa im ronwan pleis, 9en bin gaburrumap det solwoda garram klaud? 10Wal mi na. Aibin bildimap haibala wol raidaran langa det solwoda, en aibin lokimap det geit. 11En aibin tok, ‘Tharran strongbala weib blanga yu garra stap iya na! Im kaan gopas!’”aJeramaiya 5:22
Hubin dalim det san blanga gidap?
12Wal YAWEI bin kipgon tok langa Job, “Yu reken yubin dalim tharran san blanga gidap, en imbin lisin langa yu? 13Yu reken yubin holdim dijan wel en meigim im sheiksheik blanga meigim ola nogudbala pipul buldan jis laik wen yu sheikim das brom bleingkit? 14Wal wen det san gidap yu gin luk detlot hil brabli kliyawan, jis laik wen aibin peintim detlot. 15Detlot wikitmen laigim blanga wokaran ebri naitaim bat dei nomo laigim det deitaim, dumaji dei oldei lujim olabat pawa blanga dumbat ola nogudbala ting. 16Job, yubin godan en wokaran raitdan langa bodam langa det solwoda? 17Yubin luk tharran geit weya ola dedbala pipul oldei go thru? 18En hau big dijan wel? Yu dalim mi if yu sabi. 19Yu sabi weya det lait kaman brom en yu sabi weya det dakbala kaman brom? 20Yu reken yu gin deigimbek dubala langa dubala raitwan pleis? 21Ai reken yu gin dum tharran, dumaji yubin olredi bon langa det taim wen aibin meigim ebrijing, indit? 22Yubin deya langa detlot pleis weya mi oldei kipumbat ola sno en ola heilston? 23Ai kipum olabat deya blanga yusum blanga panishimbat en teikoba ol difrinwan kantri. 24Yu sabi weya tharran laitining im kaman brom, en weya det win brom sanraiswei bin go? 25Hu yu reken bin meigim det wei blanga det thanda stom? Hubin jandimbat detmatj rein 26langa detlot draiwan pleis weya nobodi jidan? 27Hu yu reken meigim det rein weya oldei tjeinjim det draiwan kantri en meigim det gras gro brabli longwan en jidan brabli grinwan? 28Hu det dedi blanga det dyu en det rein? 29Hu gibit laif langa det brabli kolwan rein 30weya im buldan kolwethataim, en detlot riba en bilibong go brabli aisiwan jis laik rok?”
Hu gin meigim ola sta jidan gudwei?
31Wal YAWEI bin kipgon tok, “Yu gin meigim detlot sta gulum Sebensista en Sospen jidan gudwei garram olabat grup? 32Wal yu reken yu gin wekimat detlot sta en pudum olabat langa olabat rait pleis, detlot sta gulum Bigwan Dipa en Lilwan Dipa? 33Yu reken yu sabi detlot lowa blanga hebin? En yu reken yu gin meigim olabat jidan bos blanga dijan wel? 34Yu reken yu gin dalim detlot klaud blanga jandimdan bigmob rein, 35en det laitining gin lisin langa yu wen yu dalim im blanga dum? 36Yubin titjimbat ola bard blanga sabi wotaim det rein en fladwoda garra kaman? 37Yu reken yu gin kaundimap ola klaud o meigim ola rein buldan 38langa ola buldas en meigim brabli madiwan?
39“Wen detlot laiyan jidan hanggriwan yu go en album olabat hanting blanga olabat daga? 40Yu jandim ola enimul langa olabat kemp? 41En wen detlot lilwan kro jidan hanggriwan en olabat oldei jingat langa mi blanga daga, yu oldei gibitbat olabat daga blanga meigim olabat sedisfaid?”

a38:8-11: Jeramaiya 5:22