Ilaihu bin apset langa Job frenmob
321Wal afta na det thribala men bin stap agaminbat langa Job na, dumaji im nomo bin wandim tok im gilti. 2En Ilaihu det san blanga Barakel, brom det femili gulum Rem brom det taun gulum Bus bin deya du, en imbin brabli nogudbinji langa Job, dumaji Job bin pudum bleim langa God en im nomo bin pudum bleim langa im ronselp. Najing. 3En imbin brabli wail langa det thribala fren blanga Job du, dumaji dei nomo bin abum eni wed blanga ensimbek Job, bat deibin kipgon toktok im gilti. 4Dumaji Ilaihu bin mowa yangbala langa det thribala men, imbin weidabat deya raidap ebribodi bin stap toktokbat. 5Wen imbin luk det thribala men nomo bin abum eni wed blanga tok langa Job, imbin brabli wail langa olabat. 6En imbin tok langa olabat, “Yumob thribala, yumob olmen, en mi oni yangmen. Wal aibin shoum rispek langa yumob, en aibin jidanbat iya kwaitbala. 7Aibin reken yumob thribala olmen yumob sabi det wei blanga God. 8Bat ai sabi na det wei im rili kaman brom det boswan God. 9Maitbi yumob olmen nomo sabi det trubalawei blanga God. 10Wal ai reken yumob lafta irrim langa mi na wanim ai garra dalim yumob.”
Ilaihu bin irrim det frenmob agaminbat gija
11-12Wal Ilaihu bin kipgon tok, “Wal aibin jidanbat iya en irrimbat langa yumob bin agaminbat gija en aibin weidabat na, dumaji yumob nomo bin shoum Job im giltiwan. 13Yumob nomo rait wen yumob bin tok, ‘Melabat sabi det wei blanga God. Larram God panishim im.’ 14Job nomo bin tok langa mi wulijim ai kaan ensimbek langa im garram yumob agamin.
15“Holot yumob bin gedim shok, dumaji yumob nomo bin abum eni wed blanga tok na. 16Bat ai kaan jidan kwaitbala, dumaji yumob bin stap toktokbat na. Nomo. 17Ai garra dalim yumob wanim mi reken na, 18dumaji ai lafta kipgon tok. Ai kaan jidan kwait. 19Mi jidan garram loda wed wulijim det wain skin wen im brabli bulap en im gulijap bas. 20Larram mi tok na, dumaji ai garram samting blanga dalim yumob en ai kaan holdimbek miselp. 21-22Ai garra gibit ebribodi feyago, en nomo meigim enibodi reken olabat haibala. If ai nomo dum lagijat, wal God det wanbala hubin meigim mi, im mait panishim mi en binijimap mi kwikbala.”