Job bin wandim im laif blanga jidan gudwan laik bifo
291Wal Job bin kipgon tok, 2“Ai wandim main laif blanga jidan gudwan laik bifo wen God bin oldei lukaftumbat mi. 3En det lait blanga im bin oldei shoum mi det wei thru langa det dakbala pleis. 4Langa det taim wen aibin jidan brabli strongbala men, det boswan God bin oldei jidan garram mi, 5en ol main bigininimob bin oldei jidan gulijap langa mi. 6Ol main kau en nenigout bin oldei gibitbat mi loda milk, en main olibtri bin gro en gibitbat mi loda oliboil.
7-8“Wal aibin det kaunsala du. Aibin go en joinap garram det najalot kaunsala en yangwan lidamob en garram detlot olmen deya langa det taun, en deibin oldei rispek langa mi en deibin ol jandap wen aibin kaman, 9-10en olabat bin ol jidan brabli kwaitbala.”
Ebribodi bin oldei shoum rispek langa Job
11Wal Job bin kipgon tok, “Ebribodi bin brabli gudbinji wanim aibin tok en dum. 12En wen ola powan pipul en ola biginini hu nomo garram mami en dedi bin jinginat blanga sambodi blanga kaman en album olabat, aibin oldei go en album langa olabat. 13Aibin album detlot hubin gulijap dai en aibin album detlot widogel du, en olabat bin ol tok theingkyu langa mi en deibin brabli gudbinji. 14En aibin kain langa olabat en bin oldei gibitbat ebribodi feyago. 15Aibin brabli kain langa ol detlot blainwan pipul en langa ol detlot leimwan pipul du. 16Aibin jis laiga dediwan blanga ol detlot powan pipul, en aibin oldei deigim pleis blanga olabat langa kothaus blanga ol detlot hubin abum trabul, nomeda olabat bin streinja. 17Aibin stapam detlot krulbalamen brom tridimbat pipul nogudbalawei, en aibin seibum olabat.
18“Aibin reken ai garra jidan laibalawan en gudbinjiwei blanga longtaim, en ai garra binijap langa main ronwan sweig garram ol main femili en frenmob. 19Langa det taim na aibin jidan brabli strongbala jis laik det tri weya im rut go raitdan langa bigismob woda, 20o jis laik nyuwan bo en erro, en aibin brabli strongbala.
21“Deibin oldei lisin langa mi wen aibin oldei toktokbat, en ola pipul bin oldei jidan kwaitbala wen olabat bin irrim wanim aibin oldei toktokbat. 22En wen aibin stap tokin, nobodi nomo bin tok enijing. Deibin jinggabat rili ad blanga ol detlot wed weya aibin oldei toktokbat. 23Det wed blanga main bin brabli gudwan langa olabat, jis laik det feswan rein weya meigim ebribodi gudbinji wen im kaman. 24Wen pipul bin jidan sedwan aibin luk langa olabat hepiwei blanga meigim olabat fil gudwan, en ebribodi bin brabli gudbinji. 25Aibin lidimbat olabat jis laik det king weya im oldei lidimbat im soljamob, en aibin meigim olabat brabli gudbinji.”