Job bin brabli nogudbinji
271Wal Job bin tok, 2“Trubala ai dalim yu. Mi brabli nogudbinji, dumaji det boswan God nomo bin gibit mi feyago. 3-4Ai garra oldei tok trubalawei langa ol main laif. God na gibit mi laif. 5Raidap langa det dei wen ai garra dai, ai kaan dum eni rong ting en ai kaan tok yumob rait, 6dumaji ebridei ai sabi ai nomo jidan giltiwan.
7“Ai garra prei blanga ol main enamimob garra ardimbat seimwei du, jis laik detlot nogudwan pipul. 8Detlot pipul hu oldei jidan nogudbala, maitbi reken dei gin jinginat langa God blanga album olabat, bat najing. 9Im kaan irrim langa olabat wen olabat jinginat langa im blanga album olabat. 10Wal lagijat na ai reken God garra dum langa olabat, dumaji olabat nomo bin laigim im, en olabat nomo prei langa im du.
11“Wal ai garra dalim yumob wanim det boswan God oldei dumbat garram im pawa. 12Yumob holot bin luk dislot ting bin hepin. Wal wotfo yumob oldei gibit mi rabishwan wed nomo garram eni mining?”
Wanim God garra dum langa nogudbala pipul?
13Wal Job bin kipgon tok, “Dijan na wanim God det brabli haibalawan oldei dumbat langa detlot nogudbala en brabli krulbala men. 14Olabat gin abum detmatj biginini, bat olabat garra jidanbat hanggriwan en detlot biginini garra daidaibat brabli krulbalawei langa wo. 15Det najalot biginini garra daidaibat brom det nogudwan siknis en detlot widogel kaan kraikraibat blanga olabat.
16“Im brabli isibala blanga detlot wikitwan pipul blanga jidan brabli ritjwan en abum detmatj klos. 17Bat blanga God pipul, olabat garra werrimon detlot klos blanga detlot ritjwan pipul, en olabat garra sherimat ola ebrijing. 18Detlot wikitwan pipul bin bildimap olabat gudwan haus, bat detlot haus kaan jidan longtaim. Dei garra buldan kwikbala jis laik sheidhaus.
19“Detlot wikitwan pipul gin go langa silip brabli ritjwan, bat wen olabat garra gidap olabat garra jidan brabli powan. 20Wen naitaim garra kaman detlot wikitwan pipul garra bradin nomo lilbit blanga samting, jis laik wen det fladwoda o bigwan rein stom kaman kwikbala. 21Afta tharran brabli hotwan win garra kaman en blowimweibat langa olabat, 22en im kaan sori langa olabat wen olabat garra trai blanga ranawei. 23En det win garra gowei brabli gudbinjiwei dumaji imbin binijimap olabat na.”