Job bin wandim jidan gudbinji
211Wal Job bin tok langa Sofara, 2“If yumob wandim meigim mi jidan brabli gudbinji, wal yumob irrim mi basdam. 3En wen mi binij toktokbat, yumob gin stat tok ola nogudbala wed igin. 4Mi nomo agamin langa pipul. Mi agamin langa God na, dumaji im nomo gibit mi feyago. 5Wen yumob oldei lukinatbat langa mi, tharran meigim yumob filim sikwan. 6En wen mi oldei jinggabat tharran na, im meigim mi nogudbinji.
7“Wotfo nogudbala pipul jidan laibala blanga longtaim en olabat oldei abum detmatj pawa? 8En olabat lukinatbat olabat bigininimob grogrobat. 9Olabat nomo wori langa olabat kemp, en God nomo panishim olabat. 10Blanga olabat buligimob oldei abumbat detmatj lilwanlilwan buligi en olabat nomo lujim eni enimul. Najing. 11Blanga olabat bigininimob oldei pleiplei en densdensbat gudbalawei olabat ronselp. 12Dislot pipul oldei abumbat gudbala taim en singsingbat garram loda gudwan myusik. 13En dei oldei jidan brabli gudbinji, nomo garram enijing rong langa olabat raidap langa det dei wen olabat redi blanga dai.”
Nogudbala pipul dalim God blanga libum olabat
14Wal Job bin kipgon tok langa Sofara, “Detlot pipul hu oldei dumbat nogudbala ting oldei tok langa det boswan God, ‘Yu libum melabat na. Yu nomo jinggabat blanga titjimbat melabat. 15Wanim melabat garra gedim wen melabat oldei preipreibat en weshipbat langa yu, God? 16Melabat bin dum brabli gudwan ting garram melabat ronwan pawa.’ Bat ai kaan teiknodis langa olabat nogudbalawei, en detlot nogudbala plen dei garram.
17“Haumeni taim God oldei gitwail en im oldei jandim nogudbala ting en dakbala blanga panishim ol detlot nogudbala pipul? 18Haumeni taim imbin hitimbat langa olabat jis laik det bigbala win weya oldei kaman en spredimat detlot gras?
19“Maitbi yumob garra tok, ‘God garra panishim detlot biginini blanga detlot nogudbala pipul, en nomo detlot nogudbala pipul.’
“Bat ai tok, ‘Larram God panishim detlot hu oldei dumbat nogudbala ting raidap olabat garra filim wanim im oldei dum langa olabat.’ 20Larram det boswan God meigim detlot pipul dringgim olabat ronwan nogudbalawei brom det kap blanga det taim weya im wail langa olabat. 21Dumaji wen olabat garra dai, olabat nomo sabi wanim garra hepin langa olabat bigininimob na.”
Hu garra dalim God wanim blanga dum?
22Wal Job bin kipgon tok, “Hu garra dalim God wanim blanga dum? Oni im na gin jadjim ola king en ola boswan. 23-24Sambala pipul oldei dai brabli ritjwan en gudbinjiwei, 25bat najalot pipul oldei dai nomo garram enijing. Olabat oni abumbat detmatj pein. 26Bat wi garra ol dai en ola wem garra gaburrumap wi.
27“Main fren olabat, ai sabi yumob oldei tok sigridbalawei blanga mi. 28Yumob bin askim, ‘Weya det kemp blanga det haibala men hu oldei dumbat nogudbala ting?’
29“Ebribodi hu jidan gulijap en longwei, olabat agri gija en dalimbat miselp 30blanga detlot pipul hu oldei dumbat nogudbala ting. Olabat nomo abumbat nogudbala ting hepin langa olabat wen God gitwail langa pipul. 31Nomo enibodi tok blanga olabat nogudbalawei, en nomo enibodi panishim langa olabat. 32En wen olabat dai, ebribodi tok gudwei blanga olabat. 33Det graun welkam olabat hom, en bigismob pipul kraikraibat blanga olabat.
34“Wal yumob bin trai blanga meigim mi gudbinji, bat yumob bin gibit langa mi rabishwan wed, nomo garram eni mining, en yumob bin dalim mi laiya.” Lagijat na Job bin tok.