Sofara bin nogudbinji langa Job
201Wal Sofara brom det taun gulum Neima bin tok igin, 2“Job, wanim yubin tok bin meigim mi brabli nogudbinji, en ai garra lafta tok igin. 3Wanim yubin tok, tharran im nogudwan wed blanga mi. Wal ai sabi wanim ai garra dalim yu.
4-5“Brom longtaim wen God bin meigim pipul en imbin pudum olabat langa dijan wel, ola nogudbala pipul bin jidan hepiwan oni blanga lilwail. Job, yu sabi tharran, indit? 6Det praudbalawei blanga olabat gro bigwan jis laik brabli longwan haus weya jidan raidap langa skai, 7bat det win gin blowimwei olabat jis laik det das. Detlot pipul hubin sabi olabat, garra jinggabat weya deibin go. 8Dei garra fogedabat detlot, jis laik deibin abum drim, 9en olabat femili en frenmob kaan neba luk olabat igin. 10En blanga olabat bigininimob, garra lafta peiyimbek wanim olabat dedi en mami bin stilimbat brom ola powan pipul. 11Detlot nogudbala pipul garra dai en go langa det greibyad wen olabat stil yangbala.”
Nogudbala pipul laigim dumbat nogudbala ting
12Wal Sofara bin kipgon tok langa Job, “Nogudbala pipul laigim dumbat nogudbala ting, dumaji olabat laigim det nogudbala ting brabliwei, jis laik dei laigim olabat daga, 13en olabat julurum det daga brabli slobala. 14Bat afta det daga garra go bitawan en poisinwan langa olabat binji en dei garra ardimbat nomo lilbit, jis laik jigiwan sneik bin baidim olabat. 15En afta tharran God garra meigim olabat lujim ol detlot brabli gudbala ting weya olabat bin stilimbat brom ola po pipul. 16Olabat garra dai dumaji detlot poisinwan sneik bin baidim langa olabat. 17Olabat kaan jidanbat brabli hepiwan langa det kantri weya dei garram detmatj oliboil en milk en shugabeig. Im jis laik detlot riba oldei randan garram oliboil en milk en shugabeig. 18Brom ol det taim wen deibin dumbat det adwek, dei kaan gedim enijing, 19dumaji deibin oldei meigimbat ola powan pipul abumbat adtaim en dei nomo bin album langa olabat, en deibin deigimoba olabat kemp.
20“Detlot nogudbala pipul brabli gridibala en dei oldei wandim olkain ting en olabat kaan neba sedisfaid. 21Bat wen nomo enijing deya blanga gajim, detlot pipul nomo enijing.
22“Wen olabat abum loda ebrijing, olabat garra oldei wori miselp en dei garra ardimbat nomo lilbit brom trabul. 23En dumaji God im brabli wail, im garra meigim olabat dagat det panishmen im garra gibit langa olabat.
24“Wen olabat garra trai blanga ranawei brom det aiyanwan spiya, olabat garra ol gitkil brom det kopawan erro. 25Det shapwan pat blanga det erro garra go rait thru langa olabat bodi, en olabat garra brabli bradin na. 26En wanim olabat laigim detmatj, dei garra lujim langa dakbala pleis, en God garra jandim faiya blanga binijimap olabat en im garra barnimap olabat tent garram ola ebrijing blanga olabat. 27Det skai en det wel garra shoum olabat dei brabli nogudbala. 28Wen God im wail im garra deigidawei ola ebrijing brom olabat.
29“Wal dijan na wanim God jinggabat blanga dum langa detlot pipul hu oldei wandim dumbat nogudbala ting.” Lagijat na Sofara bin tok.