Bilded bin tok
181Wal Bilded brom det taun gulum Shuwa bin tok na, 2“Job haulong yu garra toktokbat lagijat? Yu garra larram melabat tok na. 3O maitbi yu reken melabat wulijim detlot enimul weya nomo sabi enijing? 4Yu oldei ardim miselp wen yu wail. Yu reken tharran na garra sheikimap dijan wel o mubum detlot rok?
5-6“Det laif blanga detlot nogudbala pipul im jis laik det lemp weya sambodi pudumat insaid langa tent en im jidan dakbala.a,6Job 21:17 7Blanga olabat strongbala leig go brabli wikwan na. Dei oldei meigim plen, bat det plen na garra meigim olabat abum loda trabul. 8-10Bifo olabat sabi, olabat garra git trep langa det net weya sambodi bin haidim langa det roud. 11Nomeda eniweya olabat wandim blanga wok, det nogudbala ting oldei weidabat en bulurrumbat langa olabat en oldei bradinimbat langa olabat du. 12Olabat brabli hanggribala en det nogudbala ting garra hepin langa olabat dregli. 13Afta tharran dei garra git brabli sik, en dei garra dai.
14“Sambodi garra pulumat detlot nogudbala pipul brom olabat tent en dei garra dai krulbalawei. 15Bambai na ebrijing blanga olabat garra barnap, 16en olabat garra jidan wulijim det tri, weya im draiyap brom im rut. 17Olabat bin binijap na en nobodi kaan jinggabat blanga olabat enimo. 18Olabat jidanbat langa det dakbala pleis, en olabat nomo langa lait na. 19Olabat nomo garram eni biginini blanga kipgon langa det femili neim. 20Ebribodi brom sanraiswei raidap langa sangodanwei, olabat bradin nomo lilbit. 21Lagijat na ola nogudbala pipul en olabat femilimob garra jidan hu nomo bin wandim sabi God.” Lagijat na Bilded bin tok.

a18:5: ,6Job 21:17