Job sabi ebrijing
131Wal Job bin kipgon tok, “Ai sabi ebrijing blanga dijan wel. 2Yumob nomo sabi mowa den mi. Ai sabi ebrijing yumob sabi. 3Bat ai garra kipgon agaminbat langa God en dalim im blanga main trabul. 4Yumob brabli medwan dokta. Yumob oldei tridimbat mi garram ola laiyawan wed wen yumob tok aibin dum nogudbala ting. 5-6If yumob jidan kwaitbala en lisin langa mi, wal yumob brabli klebabala.
7“Maitbi yumob reken yumob oldei albumbat God, bat najing. Yumob dalimbat laiya, 8en yumob nomo tok rili trubalawei blanga im. Imbin askim yumob blanga albumbat im? 9Yumob reken yumob gin trikim im, if im deigim yumob langa kothaus, jis laik yumob trikimbat najalot pipul? 10If yumob nomo bin gibit feyago langa najalot pipul, im gin panishim yumob. 11En det strongbala pawa blanga im gin bradin yumob brabliwei. 12Yumob reken yumob tok gudbalawei, bat im gin blowimwei ol yumob wed jis laik das.”
Job bin dalim im frenmob blanga jidan kwaitbala
13Wal Job bin kipgon tok, “Yumob jidan kwaitbala, dumaji ai garra tok na, nomeda wanim garra hepin langa mi. 14Im orait, nomeda if ai dai. Ai nomo wori. 15Dijan laif blanga main im nomo enijing na. God gin kilim mi, bat stil ai garra kipgon dalimbat im mi nomo gilti. 16Maitbi dijan na garra seibum mi, dumaji nomo eni giltiwan men garra kaman langa God langa det kothaus.
17“Yu irrim brabli gudwei langa ol dislot wed blanga main na. 18Aibin meigim main wed redibala na, en ai sabi ai garra win, en God garra tok mi nomo gilti. 19Bat if yumob gin shoum mi giltiwan, wal ai garra lafta gibap en dai.” Lagijat na Job bin tok.
Job bin askim God blanga dubala ting
20
Wal Job bin prei langa God, “Ai garra askim yu oni blanga dubala ting, main God. If yu ensim mi ai kaan neba blandim miselp brom yu. 21Stap panishimbat mi en bradinim mi. 22Yu tok en ai garra ensim yu, o yu larram mi tok basdam, en afta yu ensim langa mi. 23Yu dalim mi blanga main nogudbalawei wulijim ai garra sabi. 24Wotfo yu nomo bin teiknodis langa mi? Wotfo yubin meigim mi enami blanga yu? 25Maitbi yu laigim bradinimbat mi wen mi oldei jidanbat wikwan. Mi jis laik det draiwan lif weya im buldan.
26“Wotfo yu oldei tok aibin oldei dumbat brabli nogudbala ting? Wotfo yu oldei panishimbat langa mi blanga ol detlot nogudbalawei weya aibin oldei dumbat wen aibin yangwan? 27Yubin taiyimap main dubala fut, en yubin oldei lukabat main trek weya aibin oldei go.aJob 33:11 28Mi jidan brabli nogudwan, jis laik det reig weya detlot badaflai bin dagadagat.”

a13:27: Job 33:11