Sofara bin reken Job tok ola rabishwan wed
111Wal Sofara brom det kantri gulum Neima bin tok langa Job, 2“Yu toktokbat ola rabishwan wed en ai garra ensim ol detlot kwestjan blanga yu na. 3Maitbi yu reken yu gin toktokbat olataim, dumaji yubin meigim melabat jidan kwaitbala en jidan sheimwan na. Bat najing. Wal ai garra meigim yu sheim du. 4Yu reken yu nomo gilti, en yu jidan raitwei langa God. 5Bat ai wandim God blanga tok langa yu, 6en meigim yu sabi ola sigridwei blanga im, en yu bina sabi God bina panishim yu brabli adbala na, bat im oni bin panishim yu lilbit.
7“Yu reken yu sabi det trubalawei blanga God det brabli haibalawan? 8Det trubalawei blanga God gin go mowa haiwan langa skai en mowa dipwan langa ola dedbala pipul, bat yu nomo sabi wanim God oldei dumbat. 9Det trubalawei im mowa bigwan langa dijan graun en langa solwoda.
10“If God pudum yu langa jeilhaus o deigim yu langa kothaus wanim yu garra du? Najing! 11God sabi pipul, en im luk ola nogudbala ting wanim olabat oldei dumbat. 12Im mowa isibala blanga meigim wailwan dongki jidan kwaitbala, bat im brabli ad blanga meigim granggibala pipul bulurrum det wei blanga God.”
Gibit yu laif langa God
13Wal Sofara bin kipgon tok, “Yu gibit yu laif langa God en prei langa im. 14Yu gibitawei det nogudbalawei blanga yu, ol detlot ting na weya yubin oldei dumbat sigridbalawei, 15wulijim yu kaan sheim, en yu garra jidan strongbala en nomo bradin enimo. 16En ola trabul blanga yu garra gowei brom yu hed, jis laik det fladwoda gowei. 17Det dakbala taim yubin oldei abumbat garra jidan brabli braitwan. 18Yu garra abum gudwan silip en jidan seifwan en yu kaan bradin en wori blanga enijing enimo. 19Yu kaan bradin wen yu silip en olabat garra rispek langa yu. 20Bat detlot pipul hu jidan brabli nogudwan garra wokwokbat jis laik blainwan en olabat nomo sabi weya olabat garra go. Dei gin oni gidawei brom olabat trabul wen olabat dai.” Lagijat na Sofara bin tok.