Job bin reken im nomo laigim jidanbat laibala
101Wal Job bin gitwail langa God. Imbin tok, “Mi nomo laigim jidanbat laibala en brom insaid main hat mi grambul langa yu main God. 2Yu nomo panishim mi. Yu dalim mi wanim aibin dum rong. 3Wotfo yu laigim detlot hu oldei dumbat nogudbala ting? En wotfo yu wandim panishim detlot pipul yubin meigim? 4Yu reken yu sabi ebrijing seimwei laik melabat oldei sabi? 5Yu reken yu garram shotwan laif wulijim melabat garram? 6Blanga tharran maitbi yu wandim faindim folt kwikbalawei langa mi. 7Yu sabi mi nomo giltiwan, bat hu garra seibum mi brom yu? 8Wal wotfo yubin meigim mi, en yu garra binijimap mi na? 9Yu sabi yubin meigim mi brom det klei. Wal yu nomo pudumbek mi langa det graun igin. 10Jis laik det tjes weya pipul meigim brom milk insaid langa pot, lagijat du yubin meigim mi insaid langa main mami binji. 11Afta tharran yubin gaburrumap main boun garram bif en skin. 12Yu na bin gibit mi laif, en yubin oldei kipgon laigim mi. En yubin kain langa mi en bin oldei wotjimbat langa mi du.”
God nomo bin dalim Job im plen
13Wal Job bin kipgon tok langa God, “Yu nomo bin dalim mi blanga det nogudbala plen yubin abum blanga mi, 14bat yu oldei lukinat langa mi dumbat nogudwan ting, en yu oldei panishim mi. 15Nomeda mi gilti, o nomo gilti bat yu stil panishim mi en mi sheim miselp na, dumaji aibin abum loda trabul. 16Nomeda ai oldei jidanbat raitwei, yu oldei hantingbat blanga mi jis laik det strongwan laiyan. Yu oldei hantingbat mi garram yu strongwan pawa. 17Yu nomo bin stap toktokbat blanga mi, dumaji yubin brabli wail langa mi. 18Wotfo yubin larram mi jidan laibala wen aibin bon? Mobeda ai bina dai bifo aibin bon, 19en olabat bina garrimap main bodi langa greib. 20-22Mi garram oni lilbit taim na. Wotfo yu kaan libum mi na, en larram mi jidan gudwei, bifo mi go langa det greibyad weya ebrijing oldei jidan dakbala en ai kaan neba kambek igin?” Lagijat na Job bin tok.