King Salaman bin tok gudbalawei langa ola pipul
Fes Kings 8:12-21
61Wal King Salaman bin prei,
“YAWEI det trubala God, yu oldei jidan deya langa dakwan klaud. 2Bat mi na bin bildimap brabli purdiwan Serramoni Pleis blanga yu, weya yu gin jidan olagijawan.”
3Ola pipul blanga Isreil bin jandap deya. En det king bin tenim miselp feis langa olabat, en imbin askim YAWEI blanga jidan gudwei langa olabat. 4Imbin tok, “Preisimbat YAWEI det trubala God blanga ola Isreil pipul. Imbin kipum det pramis imbin meigim garram main dedi Deibid wen imbin tok dijan langa im, 5‘Brom det taim na wen aibin bringimap main pipul olabat brom Ijip raidap tudei, ai nomo bin pikimat eni taun langa Isreil blanga bildimap Serramoni Pleis weya olabat gin weship mi. En ai nomo bin pikimat enibodi blanga lidimbat ol main pipul. 6Bat tudei na aibin pikimat Jerusalem, det pleis blanga weshipbat mi, en yu Deibid garra lidimbat main pipul olabat.’ Lagijat na YAWEI bin tok.
7“Main dedi Deibid bin wandim bildimap serramoni pleis blanga weshipbat YAWEI det trubala God blanga ola Isreil pipul, 8bat YAWEI bin tok langa im, ‘Yubin rait wen yubin wandim bildimap serramoni pleis blanga mi, 9bat yu kaan neba bildimap. Im blanga yu san, yu ronwan san na garra bildimap det serramoni pleis blanga mi.’aSekan Semyul 7:1-13; Fes Kranakuls 17:1-12
10“Wal YAWEI bin kipum im pramis na. Aibin jidan nyuwan king blanga Isreil pipul afta main dedi bin dai, en aibin bildimap dijan Serramoni Pleis blanga weshipbat YAWEI det trubala God blanga ola Isreil pipul. 11Aibin pudum det Seikridwan Boks garram det dubala ston garram det brabli strongwan pramis weya YAWEI bin meigim garram ola Isreil pipul langa det Serramoni Pleis.” Lagijat na King Salaman bin tok.
King Salaman bin prei
Fes Kings 8:22-53
12-13Basdam King Salaman bin meigim fletwan flo garram kopa langa midul langa det kotyad. Imbin 2.2 mita ebriwei en imbin 1.3 mita apendan brom det graun. En King Salaman bin gowap langa det fletwan flo lida langa det teibul blanga ofring en imbin nildan lida langa ola pipul en imbin lidimap im bingga langa top, 14
en imbin prei, “YAWEI, trubala God blanga Isreil. Nomo eni God langa top o langa dijan wel laik yu. Yu kipum yu brabli strongbala pramis garram yu pipul en yu shoum olabat yu laigim olabat detmatj wen dei bulurrum yu en teiknodis langa yu wed holbit. 15Yubin kipum det pramis yubin meigim garram main dedi Deibid, en tudei na ebri wed bin kaman trubala. 16Wal YAWEI, trubala God blanga Isreil yu kipum det najawan pramis yubin meigim garram main dedi wen yubin dalim im wanbala biginini brom im femili lain garra oldei jidan king blanga Isreil if dei kipgon bulurrumbat yu lowa jis laik imbin dum.bFes Kings 2:4 17Wal YAWEI, trubala God blanga Isreil, larram ebrijing kaman trubala wanim yubin pramis langa yu wekinmen Deibid.
18“Bat God, gin yu jidan iya langa dijan wel garram men en wuman? Det skai im lilwan langa yu. Wal hau dijan Serramoni Pleis weya aibin bildimap jidan bigwan langa yu?cSekan Kranakuls 2:6 19YAWEI, main God, mi na wekinmen blanga yu. Yu irrim main preya en gibit mi wanim mi askimbat yu. 20Yu wotjimbat dijan Serramoni Pleis deitaim en naitaim. Yubin pramis dijan garra jidan det pleis weya ola pipul garra weshipbat yu. Wal yu irrim mi wen ai luk langa dijan Serramoni Pleis wen mi prei.dDyudaranami 12:11 21Wal yu irrim main preya en ola preya blanga ola Isreil pipul wen dei luk langa dijan pleis en prei du. En deya langa yu kemp langa top yu irrim melabat en yu larramgo melabat fri.
22“Wen sambodi reken enibodi bin dum nogudbala ting en dei bringimap im langa det teibul blanga ofring langa det Serramoni Pleis blanga meigim strongbala pramis en tok, ‘Ai nomo bin dum det ting’, 23YAWEI, yu irrim mi langa top en yu jadjim yu wekinmen. Yu panishim det giltiwan, en yu larramgo fri det najawan hu nomo jidan giltiwan.
24“Wen det enamimob bidim ola Isreil pipul, dumaji deibin dumbat nogudbala ting, en afta olabat luk langa yu en kaman langa yu Serramoni Pleis en prei langa yu blanga larramgo olabat fri, 25yu irrim olabat langa top. Yu larramgo olabat fri brom olabat nogudbalawei en bringimbek olabat langa det kantri weya yubin gibit langa olabat grengrenfathamob.
26“Wen yu holdimbek det rein, dumaji yu pipul olabat bin gibit yu bekboun, en afta, wen dei sori miselp en kaman langa dijan Serramoni Pleis en jidan lobala en prei langa yu, 27YAWEI, yu irrim olabat langa top en larramgo fri detlot Isreil pipul brom det nogudbalawei blanga olabat en titjimbat olabat blanga jidan gudwei. En afta YAWEI, yu jandim rein langa dijan kantri blanga yu, weya yubin gibit langa yu pipul olabat blanga jidan olagijawan. 28If nomo eni daga iya langa dijan kantri, o bigbala siknis kaman, o hotwan win kilim ola sid daga, o ola insek dagat detlot sid daga, o ola enami kaman en fait, o nogudwan siknis kaman, 29yu irrim olabat preya. If yu pipul olabat sori miselp en jingat soribalawei langa yu, en lidimap olabat bingga en prei langa dijan Serramoni Pleis, 30yu irrim olabat preya. Yu irrim langa yu kemp langa top en yu larramgo olabat fri. Oni yu na sabi wanim langa olabat hat. Yu jadjim ebribodi blanga wanim deibin dumbat, 31wulijim yu pipul olabat garra rispek en duwit langa yu olataim olabat jidan langa dijan kantri weya yubin gibit langa melabat grengrenfathamob.
32“Wen pipul brom najawan kantri irrim yu garram detmatj pawa en yu redi blanga dum enijing, en dei kaman en prei langa dijan Serramoni Pleis, 33yu irrim olabat preya brom yu kemp langa top en yu ensim olabat, wulijim ola pipul langa dijan wel garra sabi yu en duwit langa yu, jis laik yu pipul olabat dumbat. En wulijim dei garra sabi dijan Serramoni Pleis aibin bildimap, im det pleis weya dei garra oldei weshipbat langa yu.
34“Wen yu dalim yu pipul olabat blanga go en faitfait olabat enami, en olabat prei langa yu, nomeda weya dei jidan, en if dei luk langa dijan taun weya yubin pikimat blanga dijan Serramoni Pleis weya aibin bildimap blanga yu. 35Yu irrim langa olabat preya brom yu kemp langa top en yu album olabat blanga bidim olabat enami.
36“Wen yu pipul olabat dum nogudbala ting langa yu, en nomo eni gudbala pipul jidan, en yu gitwail en larram olabat enami bidim olabat en deigimwei olabat prisana langa najawan kantri, nomeda det kantri im longwei, 37yu stil irrim langa olabat preya. If olabat sori miselp deya langa det kantri en prei langa yu en dalim yu blanga olabat brabli nogudbalawei, wal yu irrim olabat preya YAWEI. 38Langa det kantri na, if olabat brabli trubala en bilib brabliwei langa yu en dei luk langa dijan kantri weya yubin gibit langa olabat grengrenfathamob, dijan taun weya yubin pikimat, en dijan Serramoni Pleis det aibin bildimap blanga yu, 39yu irrim langa olabat preya. Langa yu kemp langa top yu irrim olabat en yu jidan kainbala langa olabat en larramgo fri ol detlot pipul blanga yu brom olabat nogudbalawei.
40“Wal main God yu luk langa melabat en irrim melabat preya langa dijan pleis. 41YAWEI, yu kaman en jidan iya langa yu Serramoni Pleis weya det Seikridwan Boks jidan. Yu gibit gudbala ting langa yu serramonimen blanga wanim dei oldei dumbat, en larram ol yu pipul jidan gudbinjiwei, dumaji yubin gud langa olabat. 42YAWEI, nomo gibit bekboun langa det king yubin pikimat. Yu jinggabat hau yubin laigim yu wekinmen Deibid detmatj.” Lagijat na King Salaman bin prei.e,42Ola Saam 132:8-10

a6:4-9: Sekan Semyul 7:1-13; Fes Kranakuls 17:1-12

b6:16: Fes Kings 2:4

c6:18: Sekan Kranakuls 2:6

d6:20: Dyudaranami 12:11

e6:41: ,42Ola Saam 132:8-10