51Wal wen King Salaman bin binijimap ol dislot wek langa det Serramoni Pleis, imbin pudum ol detlot ting weya im dedi Deibid bin gibit langa YAWEI deya langa detlot stowarum, ola silba, ola gol en ola najalot ebrijing.aSekan Semyul 8:11; Fes Kranakuls 18:11
Deibin bringimap det Seikridwan Boks langa det Serramoni Pleis
Fes Kings 8:1-9
2Wal King Salaman bin jingat langa ol detlot lidamob brom ola klen en femili brom Isreil blanga go langa Jerusalem blanga deigim det Seikridwan Boks brom Saiyan, det taun blanga Deibid langa det Serramoni Pleis.bSekan Semyul 6:12-15; Fes Kranakuls 15:25-28 3Deibin ol majurrumap miselp seimtaim weya deibin abum det speshalwan serramoni gulum Hampi. 4Wen ola lidamob bin majurrumap miselp, detlot Libaimen bin lidimap det Seikridwan Boks, 5en deibin garrimap langa det Serramoni Pleis. Detlot serramonimen en detlot Libaimen bin mubum det Seikridwan Tent blanga YAWEI du, en ol detlot ebrijing blanga det Tent langa det Serramoni Pleis.
6Wal King Salaman en ol detlot Isreil pipul bin majurrumap miselp lida blanga det Seikridwan Boks en deibin sekrifais loda ship en buligi, deibin adli kaundimap detlot enimul.
7Afta, detlot serramonimen bin garrimap det Seikridwan Boks blanga YAWEI en deigim insaid langa det Serramoni Pleis en pudum langa det Brabli Seikridwan Rum andanith langa det dubala enimul garram wing. 8Detlot wing bin gaburrumap det Seikridwan Boks en detlot pol blanga garrimap det Seikridwan Boks. 9En det laswan pat blanga det dubala pol bin stikinat, bat oni detlot pipul hu jandap lida langa det Brabli Seikridwan Rum gin luk det dubala pol. Det dubala pol stil jidan deya tudei. 10Nomo enijing bin jidan insaid langa det Seikridwan Boks, oni det dubala speshalwan ston weya Mosis bin pudum wen imbin deya langa det hil gulum Sainai, langa det taim na wen YAWEI bin meigim brabli strongwan pramis garram detlot pipul blanga Isreil wen deibin kaman brom Ijip.cDyudaranami 10:5
Det braitwan lait blanga YAWEI
11-14Ol detlot serramonimen brom ebri grup bin meigim miselp klinbala blanga serramoni. Detlot Libaimen hubin plei myusik bin neim Eisaf, Heiman en Jedathan, en detlot brom olabat femilimob bin werrimon klos brom brabli gudwan matiriyal. Detlot Libaimen bin jandap sanraiswei langa det teibul blanga ofring garram lilwan drum gulum simbul en det gita gulum hap. 120 serramonimen bin pleipleibat detlot longwan wisul garram olabat. Detlot singamob bin sing gudwei garram det myusik brom detlot longwan wisul, simbul en najalot ting. Deibin preisimbat YAWEI en sing dijan song, “Preisimbat YAWEI, dumaji im brabli gudbala, En im laigim ola pipul olagijawan.” En wen detlot serramoni men bin gowei brom det Serramoni Pleis, bigiswan klaud garram braitwan lait blanga YAWEI bin jandap deya en deibin lafta gowei brom det pleis.dEksadas 40:34,35; Fes Kranakuls 16:34; Sekan Kranakuls 7:3; Esra 3:11; Ola Saam 100:5; 106:1 107:1; 118:1; 136:1; Jeramaiya 33:11

a5:1: Sekan Semyul 8:11; Fes Kranakuls 18:11

b5:2: Sekan Semyul 6:12-15; Fes Kranakuls 15:25-28

c5:10: Dyudaranami 10:5

d5:11-14: Eksadas 40:34,35; Fes Kranakuls 16:34; Sekan Kranakuls 7:3; Esra 3:11; Ola Saam 100:5; 106:1 107:1; 118:1; 136:1; Jeramaiya 33:11