Detlot klen langa nowath bin gibit bekboun langa Reiyabowam
Fes Kings 12:1-20
101Wal Reiyabowam bin go langa det taun gulum Shekam, ola pipul brom Isreil bin kaman deya blanga meigim im jidan king. 2Wen Jerabowam det san blanga Neibat bin irrim det King Salaman bin dai, imbin kambek brom Ijip, dumaji imbin go deya blanga haidim miselp brom King Salaman. 3Wal detlot klen weya jidan nowathwei bin jandim wed langa im blanga kaman langa olabat. Deibin ol go mijamet langa King Reiyabowam en deibin tok langa im, 4“Yu dedi King Salaman bin meigim melabat wek brabli adbala, bat if yu nomo meigim melabat wek brabli adbala lagijat, wal melabat gin dum enijing yu askim melabat blanga dum.”
5Wal King Reiyabowam bin tok, “Ai garra jinggabat dijan. Yumob garra kambek thrideistaim langa mi.” Wal ola pipul bin gowei na.
6King Reiyabowam bin askim ola olmen hubin jidan boswan lida blanga im dedi King Salaman, “Wanim ai garra dalim ola pipul?”
7Deibin tok, “If yu wandim ola pipul blanga album yu en duwit langa yu, wal yu garra kain langa olabat en tok langa olabat gudwei.” 8Bat King Reiyabowam nomo bin teiknodis langa detlot olmen en imbin go langa ola yangmen hubin growap mijamet garram im en hubin jidan boswan lida blanga im na. 9Imbin tok, “Wanim yumob reken ai garra dum? Wanim ai garra dalim detlot pipul hubin askim mi nomo blanga meigim olabat wek brabli adbala?”
10Deibin tok, “Wal melabat reken yu garra lafta tok, ‘Main dedi bin strongbala, bat ai garra jidan mowa strongbala. 11Main dedi bin meigim yumob wek adbala, bat ai garra meigim yumob wek mowa adbala. Main dedi bin yusum wip langa yumob, bat ai garra yusum stokwip langa yumob.’”
12Wal thrideistaim Jerabowam en ola pipul bin kambek langa King Reiyabowam laik imbin dalim olabat. 13King Reiyabowam nomo bin teiknodis langa detlot olmen hubin wek blanga im dedi en imbin tok rafwei langa ola pipul, 14jis laik wanim detlot yangmen bin dalim im blanga tok, “Main dedi bin meigim yumob wek adbala, bat ai garra meigim yumob wek mowa adbala. Main dedi bin yusum wip langa yumob, bat ai garra yusum brabli strongwan stokwip langa yumob.” 15-19Wen detlot pipul bin sabi King Reiyabowam nomo bin teiknodis langa olabat, deibin jingat adbala, “Wi kaan rispek langa Deibid femilimob na. Dei nomo bin album wi! Wi garra gobek langa wi ronwan kantri. King Reiyabowam gin lukaftumbat im ronwan pipul na.” Lagijat na deibin gibit bekboun langa im.
Wal King Reiyabowam bin jandim Edaniram hubin jidan bos blanga ola wekinmen hu nomo bin gedim pei, blanga tok langa detlot pipul, bat deibin stonim im en kilim im ded. Wal King Reiyabowam bin go kwikbala garram im bagi en bin gobek langa Jerusalem.
Brom det taim na ola Isreil pipul brom det nowathwan kantri gulum Isreil bin gibit bekboun langa ola bigininimob blanga Deibid langa det sauthwan kantri gulum Juda. En Reiyabowam bin jidan king oni blanga detlot pipul hubin jidan langa Juda. Basdam det speshalwan mesinja blanga YAWEI gulum Ahija brom Shilo bin tok langa Jerabowam hau ol dislot ting garra hepin, en imbin hepin lagijat na.aSekan Semyul 20:1 Det nowathwan kantri gulum Isreil en det sauthwan kantri gulum Juda weya bin kadimat miselp

a10:15-19: Sekan Semyul 20:1