Deibid bin jidan king blanga Isreil en Juda pipul
Sekan Semyul 5:1-10
111Wal afta na ola pipul blanga Isreil bin go langa Deibid deya langa det taun gulum Hebran, en deibin tok langa im, “Melabat na yu ronwan kantrimen. 2En wen Sol bin jidan king, yubin oldei lidimbat ola solja blanga melabat blanga fait langa wo, en YAWEI det trubala God bin meigim pramis langa yu blanga meigim yu jidan boswan lida en lukaftumbat ol im pipul.” Lagijat na deibin tok. 3Wal lagijat na detlot lida blanga ola Isreil pipul bin tok langa Deibid wen deibin go langa im deya langa Hebran. Wal Deibid bin agri garram olabat, en imbin meigim pramis langa olabat en langa YAWEI blanga jidan gudbala king blanga olabat. Deibin spilim det speshalwan oil ontop langa Deibid hed blanga meigim im jidan king blanga ola Isreil pipul, jis laik YAWEI bin pramis garram im speshalwan mesinja gulum Semyul.
4Wal afta wen detlot Isreil pipul bin meigim Deibid jidan king blanga olabat, im en im solja olabat bin go langa det taun gulum Jerusalem blanga fait langa det Jebusait traib hubin oldei jidanbat deya. Deibin gulum det taun Jebus.aJoshuwa 15:63; Jadjis 1:21 5Detlot Jebusait pipul bin dalim King Deibid im nomo strongbala blanga kaman insaid langa olabat taun en bidim olabat. Bat King Deibid en im solja olabat bin bidim olabat, en deibin teikoba det strongbala taun gulum Saiyan, en deibin gulum im Deibidtaun.
6Wal King Deibid bin tok, “Det feswan solja hu garra kilim ded eni Jebusait, im garra jidan bos blanga ol main soljamob.” Wal Jowab, im mami bin neim Sewuwaiya, bin gowin feswan en imbin jidan lida na. 7Bat afta wen King Deibid bin oldei jidan deya langa det strongbala taun, deibin gulum det taun Deibidtaun. 8King Deibid bin bildimap det taun igin. Imbin stat bildimap det taun brom det pleis weya deibin hipimap loda graun sanraisaid langa det hil, en Jowab bin bildimap det taun du. 9Wal King Deibid bin gro mowa strongbala olataim, dumaji YAWEI det boswan God bin oldei jidan garram im.
Detlot nambawan soljamob blanga King Deibid
Sekan Semyul 23:8-39
10Wal King Deibid bin abum sambala nambawan solja. Detlot solja en ola pipul blanga Isreil bin album Deibid jidan king jis laik YAWEI bin pramis im en deibin ol kipum det kantri strongbala.
11Wal det feswan solja imbin lida blanga Detlot Thribala Solja. Im neim bin Jeishabim. Imbin brom det femili gulum Hekman. Wantaim imbin fait langa 300 enami solja, im miselp garram im spiya, en imbin kilim olabat holot ded. 12Det sekanwan solja blanga Detlot Thribala Solja bin neim Eliyeisa. Imbin det san blanga Dodo, brom det femili neim Eiho. 13Imbin deya garram King Deibid en ola Isreil solja langa Pasdamim wen deibin fait langa ola Filastain solja hubin majurrumap miselp blanga fait. Imbin langa det pleis weya deibin growimap sid daga wen ola Isreil solja bin ranawei. 14Bat Eliyeisa en im men nomo bin ranawei. Deibin jandapbat deya gin, en deibin fait langa detlot Filastain solja garram olabat bigwan naif, en YAWEI bin album olabat blanga win det fait.
15Wal wandei Detlot Thribala Solja brom detlot 30 gudwan solja bin go langa det keib gulijap langa det keib gulum Edulam weya King Deibid bin jidan. King Deibid bin jidan deya langa det keib ontop langa det strongwan hil, en sambala Filastain solja bin kemp deya gin langa det pleis gulum Reifait Beli. 16Det dei King Deibid bin deya insaid langa det strongbala haus ontop langa hil, en sambala Filastain solja bin jidan langa det taun gulum Bethlahem du. 17Wal King Deibid bin tok, “Mi thestiwan. Ai wandim woda brom det wel gulijap langa det geit langa Bethlahem.” 18Wal Detlot Thribala Solja bin go snikibalawei thru langa detlot Filastain kemp, en deibin gajim woda brom det wel, en deibin deigimbek det woda langa King Deibid.
Bat King Deibid nomo bin wandi dringgim det woda. Imbin spilim det woda blanga gibit ofring langa YAWEI, 19en King Deibid bin tok, “Ai kaan dringgim dijan woda dumaji Detlot Thribala Solja bin redi blanga gibit miselp laif blanga mi.” Wal im nomo bin dringgim tharran na. Dislot na ola ting Detlot Thribala Solja bin dum.
20Wal Ebishai det braja blanga Jowab bin lida blanga Detlot 30 Solja. Wantaim imbin fait 300 soljamob, im miselp garram im spiya, en imbin kilim olabat ded, en blanga tharran na ebribodi bin sabi im, en imbin jidan lida blanga Detlot 30 Solja. 21Imbin jidan nambawan blanga Detlot 30 Solja, en imbin lida blanga olabat. Bat dei nomo bin meigim im jidan mowa haibala langa detlot solja dei gulum Detlot Thribala Solja, dumaji olabat bin brabli boswan.
22Wal najawan nambawan solja bin neim Benaiya. Imbin det san blanga Jehoiyada brom det taun gulum Kebsil, en imbin dum olkain breibwan ting. Wantaim imbin kilim ded dubala brabli strongwan solja brom det kantri gulum Moweb. En wen imbin kolwethataim, Benaiya bin godan insaid langa wan hol weya laiyan bin oldei jidan, en imbin kilim det laiyan ded. 23En wantaim imbin kilim wan solja brom Ijip. Det solja bin brabli bigwan men, en imbin abum bigwan spiya langa im bingga. Benaiya bin fait langa im garram bigwan stik, en imbin grebum det spiya brom det men bingga, en imbin kilim im ded garram im ronwan spiya. 24Ol detlot ting na Benaiya bin dum, jis laik Detlot Thribala Solja bin dum. 25En King Deibid bin meigim im jidan bos blanga ola blijiman hubin oldei lukaftumbat im. Binaiya bin jidan nambawan brom Detlot 30 Solja. Bat im nomo bin jidan mowa haibala langa detlot solja weya ebribodi bin gulum Detlot Thribala Solja.
26-47Wal iya na ola neim blanga ola najalot brabli gudwan solja.
Esahel hubin det braja blanga Jowab,
Elanan hubin det san blanga Dodo brom det taun gulum Bethlahem,
Shamoth hubin brom det taun gulum Harod,
Heles hubin brom det taun gulum Pelet,
Aira hubin det san blanga Aikesh brom det taun gulum Tekowa,
Abaiyesa hubin brom det taun gulum Einathoth,
Sibakai hubin brom det taun gulum Husha,
Ailai hubin brom det taun gulum Eiho,
Maharai hubin brom det taun gulum Netofa,
Heled hubin det san blanga Beina brom det taun gulum Netofa,
Ithai hubin det san blanga Ribai brom det taun gulum Gibiya deya langa det kantri blanga det Benjamin klen,
Benaiya hubin brom det taun gulum Pairathan,
Hurai hubin brom det beli gulijap langa det taun gulum Geiyish,
Abaiyel hubin brom det taun gulum Aba,
Esmabeth hubin brom det taun gulum Bahuram,
Eliyaba hubin brom det taun gulum Shalbon,
Hashem hubin brom det taun gulum Gison,
Jonathan hubin det san blanga Shagi brom det taun gulum Herara,
Eihaiyam hubin det san blanga Seka brom det taun gulum Herara,
Elifal hubin det san blanga Yura,
Hefa hubin brom det taun gulum Mekera,
Ahija hubin brom det taun gulum Pelon,
Hesro hubin brom det taun gulum Kamul,
Neirai hubin san blanga Esbai,
Jowal hubin braja blanga Neithan,
Miba hubin san blanga Heigri,
Selek hubin brom det taun gulum Eman,
Neiharai hubin brom det taun gulum Biroth en imbin oldei garrimap ol detlot faiting giya blanga Jowab,
Aira en Gareb hubin brom det taun gulum Jeitiya,
Yuraiya hubin brom det traib gulum Hitait,
Seibad hubin san blanga Alai,
Edina hubin san blanga Shisa, en imbin wan boswan men brom det Rubin klen en blanga im ronwan grup garram 30 solja,
Henan hubin san blanga Meiyaka,
Hoshafet hubin brom det taun gulum Mithan,
Yusiya hubin brom det taun gulum Eshtera,
Shama en Jeiyel, det dubala san blanga Hotham hubin brom det taun gulum Eroya,
Jedaiyel en Joha, det dubala san blanga Shimri hubin brom det taun gulum Tis,
Eliyel hubin brom det taun gulum Mahaba,
Jeribai en Joshabaiya, hubin det dubala san blanga Elnam,
Ithama hubin brom det kantri gulum Moweb,
en Eliyel, Obed en Jasiyel hubin brom det taun gulum Soba.

a11:4: Joshuwa 15:63; Jadjis 1:21