Jowesh det king blanga Juda
Sekan Kranakuls 24:1-16
121Wal langa det namba 7 yiya wen Jeihu bin jidan king langa Isreil, deibin meigim Jowesh jidan det nyuwan king blanga Juda en imbin jidan king blanga Juda 40 yiya. En Jowesh mami bin neim Saibiya en imbin brom det taun gulum Biyashiba. 2Sekan Kings Jowesh bin oldei dum wanim bin meigim YAWEI det trubalawan God gudbinji langa im, dumaji Jehoiyada det serramonimen bin oldei titjimbat im hau blanga jidan raitwei. 3Bat King Jowesh nomo bin breigimap ola nogudwan weship pleis en ola pipul bin kipgon gibitbat sekrifais ofring en barnimbat det gudsmelwan medisin deya langa detlot nogudwan weship pleis blanga ola najakain drimin.
4Wal King Jowesh bin tok langa ola serramonimen en imbin dalim olabat blanga kipum ola mani weya ola pipul bin gibit blanga pei blanga detlot sekrifais ofring langa det Serramoni Pleis en ola ofring mani weya deibin gibit gudbinjiwei langa YAWEI.aEksadas 30:11-16 5King Jowesh bin dalim ola serramonimen blanga lukaftum detlot mani weya deibin bringimap gudbinjiwei blanga ofring. En det mani weya deibin gibit imbin blanga wek langa det Serramoni Pleis.
6Bat wen imbin det namba 23 yiya wen Jowesh bin jidan king, ola serramonimen stil nomo bin fiksimap enijing langa det Serramoni Pleis. 7Wal King Jowesh bin jingat langa Jehoiyada en ola serramonimen en imbin askim olabat, “Wotfo yumob nomo bin fiksimap det Serramoni Pleis en meigim gudwan? Wal brom tudei na yumob kaan kipum detlot mani weya yumob bin gajimbat. Yumob garra hendimoba det mani langa mi en ai garra peiyim najalot wekinmen blanga meigim det Serramoni Pleis gudwan.” 8En ol detlot serramonimen bin agri langa wanim King Jowesh bin dalim olabat.
9Brom deya Jehoiyada bin gajim wanbala boks en imbin meigim hol ontopwei langa det boks. En imbin pudum det boks wansaid langa det teibul blanga ofring deya raidensaid langa det dowawei blanga det Serramoni Pleis. Ebritaim wen ola pipul bin oldei go blanga weship langa YAWEI deibin oldei gibit ola ofring mani langa detlot serramonimen hubin wek deya, en deibin oldei pudum insaid langa det ofring boks. 10Wen det boks bin oldei jidan fulwan garram ola mani, det wekinmen blanga det king hubin oldei raidimdan ebrijing weya det king bin oldei dalim im, en det haibala serramonimen bin oldei kaundimap ola ofring mani en pudum insaid langa beig en taiyimap. 11Brom deya wen deibin raidimdan haumatj mani bin insaid deya deibin gibit det mani langa det boswan blanga det wek langa det Serramoni Pleis blanga peiyim ola men hubin wekwek blanga meigim det Serramoni Pleis nyuwan. Deibin peiyim ola men hubin fiksimap det haus, 12ol detlot hu wek garram ola ston en wud. En garram det mani deibin yusum blanga baiyim ola wud en ston du en ola najalot ting weya deibin wandim blanga meigim det haus gudwan igin.
13Dei nomo bin yusum det mani blanga meigimbat silbawan kap en boul en longwan wisul en tul blanga yusum langa ola lemp o eni silbawan o golwan enijing. 14Ol detlot mani deibin yusum blanga peiyim ola wekinmen en blanga baiyim ola enijing blanga meigim det haus nyuwan. 15Detlot boswan wekinmen bin jidan trubalawan en blanga tharran na nobodi nomo bin deya blanga kaundimap detlot mani.bSekan Kings 22:7 16Detlot serramonimen bin lau kipum oni detlot ofring mani weya enibodi bin pei blanga meigim miselp fri brom det nogudbala ting weya deibin dum en ola ofring mani weya enibodi bin pei wen deibin dumbat nogudbala ting. Dei nomo bin pudum detlot mani langa det boks, imbin blanga detlot serramonimen.cLabidakas 7:7
17-18Wal langa det taim na wen Jowesh bin jidan king blanga Juda, Heiseiyel det king blanga Siriya bin fait en teikoba det taun gulum Geth, deya langa Juda. Brom deya imbin jinggabat blanga go en fait langa Jerusalem. Wal King Jowesh bin gajim ola ofring weya detlot king hubin jidan basdam neim Jehosafet, Jehoram en Eihesaiya en blanga im ronwan ofring du weya deibin gibit langa YAWEI. En imbin deigim ola gol du brom det speshalwan rum langa det Serramoni Pleis en brom det bigwan haus blanga im. En ol detlot ebrijing na imbin jandim blanga gibit King Heiseiyel, wulijim Heiseiyel kaan go blanga fait langa Jerusalem na.
19Wal ebrijing weya King Jowesh bin dum deibin raidimdan langa det buk gulum Ola stori blanga ola king brom Juda.
20-21Ola hedbos blanga Jowesh det king bin meigim sigridwan plen blanga kilim im ded, en Josaka hubin det san blanga Shimiyeth, en Jehosabed hubin det san blanga Shoma, det dubala na bin kilim King Jowesh ded langa wanbala haus. Det haus bin jidan sanraiswei langa Jerusalem det taun blanga Deibid gulijap langa det roud blanga Saila. Deibin berrim King Jowesh deya langa det greibyad weya deibin berrim ola king deya langa det taun blanga Deibid gulum Jerusalem. En im san Amasaiya bin jidan det nyuwan king.

a12:4: Eksadas 30:11-16

b12:15: Sekan Kings 22:7

c12:16: Labidakas 7:7