Haus blanga King Salaman
71Wal King Salaman bin deigim 13 yiya blanga bildimap ol detlot difrinwan haus blanga im. 2-3Deibin gulum det wanbala haus det Lebanan Tri Haus. Deibin meigim det haus garram det sidatri wud. Imbin jidan 45 mita long en 23 mita kroswei en 14 mita apendan. Deibin meigim loda pos brom sidatri wud en deibin jandimap detlot pos blanga holdimap ola timba blanga det ruf. Detlot pos deibin pudum langa thribala lain en langa ebri lain deibin pudum 15 pos. Det insaidpat blanga det ruf deibin meigim brom sidatri wud du. 4En langa dubala said wol blanga det haus, deibin abum thribala pat blanga windo. 5Thribala windo bin wansaid en thribala bin najasaid. En det haus bin abum siksbala dowa.
6Det najawan bin det haus gulum Pos Haus, en imbin 22 mita long en 13.5 mita kroswei, en langa det frantpat blanga det bigwan haus deibin bildimap brenda garram pos en ruf.
7Imbin meigim najawan haus en deya na King Salaman bin abum det speshalwan tjeya blanga king weya imbin jidan wen imbin oldei kotimbat ola pipul. Imbin gulum det haus Det Kot Haus en deibin meigim det flopat, wol en ruf garram det sidatri wud.
8Salaman bin meigim najawan haus seimwei laik det najalot, en imbin jidan deya. Det haus bin jidan biyain langa Det Kot Haus. En imbin meigim najawan haus seimwei blanga im waif hubin det doda blanga det king brom Ijip.aFes Kings 3:1
9En ola wol blanga detlot haus deibin bildimap garram ola brabli gudwan ston. Deibin gedim detlot ston brom wan pleis weya deibin kadim blanga meigim raitsais blanga detlot haus. 10Sambala ston bin brabli bigwan, gulijap 5 mita long en najalot 4 mita long en deibin pudum blanga det flopat langa detlot bigwan haus, 11en sambala najalot ston bin jidan ontop langa detlot feswan ston blanga bildimap detlot haus. En kroswei ontop langa detlot wol deibin pudum sidatri wud blanga holdimap detlot ruf. 12Raidaran langa ol detlot bigwan haus deibin abum opinwan pleis, nomo garram ruf, en raidaran langa tharran deibin bildimap wol weya deibin pudum wanbala lain blanga sidatri wud en ontopwei deibin pudum thribala lain blanga ston, jis laik det wol langa det opinwan pleis blanga det Serramoni Pleis en sambala wol blanga det Serramoni Pleis.
Det wek blanga Huram
13Wal King Salaman bin jandim wed langa wan men neim Huram hubin jidan langa det taun gulum Taya. Imbin brabli klebabala men blanga meigimbat enijing garram kopa. 14Blanga im dedi bin dai na, bat imbin brabli klebawan du blanga meigimbat enijing garram kopa. Imbin brom Taya en im mami bin brom Neftali klen. Huram bin brabli klebabala men en imbin sabi hau blanga meigim ebrijing garram kopa. En Huram bin go langa King Salaman, en imbin meigim im boswan blanga ola kopa wek.
Dubala kopa pos
Sekan Kranakuls 3:15-17
15Wal Huram bin meigim dubala kopawan pos en imbin pudum lida langa det Serramoni Pleis. Deibin 8 mita apendan en raidaran langa wanbala imbin 5.3 mita. 16-20Ontop langa det dubala pos imbin meigim bigwan sheip laiga woda lili en dubala bin 2 mita apendan. En andanith langa det dubala imbin meigim purdiwan garram sambala tjein, en frut daga gulum pamagrenit en deibin jidan raidaran langa det dubala pos. Det dubala woda lili sheip imbin meigim purdiwan du garram sambala tjein en 200 pamagrenit. Ol detlot purdiwan pat imbin meigim garram det kopa. 21Huram bin pudum det dubala kopawan pos lida langa det Serramoni Pleis. Det wanbala langa det sauthsaid, imbin gulum Jeikin, en det najawan langa nowathsaid, imbin gulum Bowes. 22Det dubala woda lili sheip bin ontop langa det dubala pos. Lagijat na deibin binijim det dubala pos.
Det bigwan kopawan teingk
Sekan Kranakuls 4:2-5
23Wal Huram bin meigim raunwan kopawan teingk. Imbin 2 mita apendan, en raidaran langa det teingk bin 14 mita, en imbin 5 mita kroswei. 24Raidaran langa det teingk atsaidwei imbin meigim garram olkain pamkin sheip. Imbin meigim det teingk brom wanbala bigwan kopa. 25Det teingk bin jidan ontop langa detlot 12 kopawan buligi. Thribala bin lukinat sangidapwei, en thribala sangodanwei, en thribala langa nowathwei, en thribala langa sauthwei. 26Det sheip blanga det teingk bin jis laiga kap en woda lili, en det teingk gin holdim 40,000 lita woda insaid. Det wolpat bin 75 milamita thikwan.
Ola kopawan bagi
27-39Wal Huram bin meigim 10 bagi garram kopa du. Deibin 2 mita kroswei en 2 mita long en 1.5 mita apendan. Langa detlot fobala said imbin meigim pitja blanga ola laiyan en buligi en detlot sheip garram wing, en raidaran langa olabat bin ola pitja blanga ola purdiwan flawa en pamtri en tjein du. Detlot bagi bin abum fobala kopawan wil. Ontop langa detlot bagi imbin meigim raunwan pat blanga holdim detlot dish blanga woda. Imbin meigim det raunwan pat purdiwan garram pitja blanga tjein en ola purdiflawa du. Imbin 45 sentamita apendan brom det top blanga det bagi en 18 sentamita insaidwei. Imbin meigim detlot wil 75 sentamita apendan, en imbin meigim seimwei laiga bigwan bagi wil, en ebrijing langa detlot wil imbin meigim garram kopa. Seimwei na imbin meigim ol detlot bagi en deibin ol abum pitja blanga enimulmob garram wing, en ola laiyan en pamtri. Huram bin meigim tenbala dish blanga detlot bagi. Ol detlot dish bin 1.8 mita kroswei en dei gin holdim 800 lita woda. Imbin pudum faibala bagi wansaid langa det Serramoni Pleis en faibala najasaid en det bigwan kopawan teingk imbin pudum lida sanraiswei.bEksadas 30:17-21
Ola enijing langa det Serramoni Pleis
Sekan Kranakuls 4:11-5:1
40-45Wal Huram bin meigim ola sospen, shabul, en ola dish du. Imbin binijim ola wek blanga King Salaman blanga det Serramoni Pleis blanga YAWEI det trubala God. Wal Huram bin meigim det dubala bigwan kopawan pos garram det dubala woda lili sheip ontopwei, en ola purdiwan pitja en sheip blanga tjein, en 400 frut daga sheip gulum pamagrenit raidaran langa top. En imbin meigim det tenbala bagi en tenbala dish, en det bigwan teingk en detlot 12 buligi weya bin holdimap det teingk, en detlot sospen, shabul en dish du.
Ol detlot ting na blanga King Salaman, Huram bin meigim garram brabli shainiwan kopa blanga det Serramoni Pleis. 46Imbin dum det wek gulijap langa det Jodan Riba en gulijap langa det dubala taun gulum Sukait en Serathan. 47Salaman nomo bin weiyimbat detlot kopawan ting dumaji deibin detmatj ting. En blanga tharran na wi nomo sabi hau hebi deibin jidan.
48Wal Salaman bin dalim sambala blanga meigim ola golwan ebrijing blanga det Serramoni Pleis. Deibin meigim golwan det teibul blanga ofring en det najawan teibul blanga det speshalwan damba weya deibin gibit langa God.cEksadas 25:23-30; 30:1-3 49-50Deibin meigim det tenbala lempsten weya bin jandap lida langa det Brabli Seikridwan Rum. Faibala bin langa sauthsaid en faibala bin langa nowathsaid. Detlot purdiflawa en lemp en kap, en dish, en detlot dish blanga det gudsmelwan medisin, en det dish blanga garrimap hotwan eshis, en ola najalot ting weya deibin yusum, deibin ol golwan. En ol detlot pat weya holdimap detlot dowa langa detlot wol deya langa det Serramoni Pleis bin golwan du.dEksadas 25:31-40 51Wal wen King Salaman bin binij ola detlot wek langa det Serramoni Pleis imbin pudum ola ebrijing weya im dedi Deibid bin gibit langa YAWEI langa ola stowa rum deya langa det Serramoni Pleis. Imbin pudum detlot silba, gol en ola enijing langa detlot rum na.eSekan Semyul 8:11; Fes Kranakuls 18:11

a7:8: Fes Kings 3:1

b7:38: Eksadas 30:17-21

c7:48: Eksadas 25:23-30; 30:1-3

d7:49: Eksadas 25:31-40

e7:51: Sekan Semyul 8:11; Fes Kranakuls 18:11