King Deibid en Mefibosheth
91Wal wandei King Deibid bin askim im ofsaida, “Enibodi brom Sol femili stil jidan laibala o deibin ol dai? Dumaji if enibodi laibala, wal ai wandi kain langa im blanga shoum rispek langa main gudfren Jonathan det dedbala san blanga Sol.”aFes Semyul 20:15-17
2Wal wanbala wekinmen blanga Sol femili bin jidan deya. Imbin neim Saiba, en det ofsaida blanga King Deibid bin dalim im blanga go langa King Deibid, en wen imbin kamat langa im, King Deibid bin askim im, “Yu na Saiba det wekinmen blanga Sol, indit?”
En det wekinmen bin tok, “Yuwai, bos. Mi na im.”
3Wal King Deibid bin askim im, “Enibodi brom Sol femili stil jidan laibala? Dumaji ai wandi kain langa im jis laik God bin kain langa mi.”
Wal det wekinmen bin tok, “Det san blanga Jonathan neim Mefibosheth stil jidan laibala. Bat im kripulwan.”bSekan Semyul 4:4
4Wal King Deibid bin tok, “Wujei im jidan?”
En det wekinmen bin tok, “Im jidan langa det taun gulum Lodaba deya langa det kemp blanga Amiyel det san blanga wan men neim Mekiya.”
5Wal wen det wekinmen bin tok lagijat, King Deibid bin jandim wed langa Mefibosheth blanga kaman langa im, 6en wen Mefibosheth bin kaman langa im, imbin baudan lida langa King Deibid blanga shoum rispek langa im, en King Deibid bin dalim im, “Mefibosheth.”
En Mefibosheth bin tok, “Mi na yu wekinmen.”
7En King Deibid bin tok, “Yu nomo wandi bradin, dumaji ai garra kain langa yu blanga shoum rispek langa main gudfren Jonathan yu dedi, en ai garra gibit langa yu ola kantri weya yu grenfatha Sol bin abum, en yu garra oldei dagat daga iya langa main kemp.”
8Wal Mefibosheth bin baudan langa graun igin, en imbin dalim King Deibid, “Mi rabishwan. Wotfo yu wandi kain langa mi lagijat?”
9Wal King Deibid bin jingat langa Saiba det wekinmen blanga Sol, en wen imbin kaman langa im, imbin dalim im, “Aibin gibit Mefibosheth ola enijing weya Sol en im femili olabat bin abum, dumaji im na det grensan blanga Sol det bos blanga yu. 10En yu en yu san olabat en yu wekinmen olabat garra lukaftumbat ola enijing en ola gadin blanga Mefibosheth en im femili olabat, en yumob garra bajimap ola daga brom detlot gadin blanga olabat wulijim dei garra abum loda daga blanga dagat. Bat Mefibosheth imselp garra oldei dagat daga langa main ronwan kemp.” Lagijat na King Deibid bin tok langa det wekinmen.
Wal det wekinmen bin abum 15 san en 20 wekinmen olabat, 11-13en imbin dalim King Deibid, “Yu na main bos en main king. En ai garra dum ebrijing weya yu wandim mi blanga dum.”
Wal afta na det wekinmen en im femili olabat bin jidan wekinmen blanga Mefibosheth. En Mefibosheth bin go en jidan langa Jerusalem weya King Deibid bin jidan, en nomeda imbin kripulwan langa im fut dubala, bat stil imbin oldei dagat daga deya gin langa det kemp blanga King Deibid, en imbin oldei jidan jis laiga san blanga King Deibid. En Mefibosheth bin abum ronwan san du neim Mika.

a9:1: Fes Semyul 20:15-17

b9:3: Sekan Semyul 4:4